Smnewstl.com 29-12-21 (Dili) — Tinan oin 2022, governu liu husi Ministériu Obras Públikas (MOP) sei halo impréstimu osan hamutuk $ 1.4 milloens husi Banku Dezenvolvimentu Aziátiku (SBD) ho Banku Mundiál atu finansia estudu Detail Engineering Design (DED) bá Ponte Loes.
Vise MOP, Nicolau Lino Freitas Belo hateten, MOP tau ona iha prioridade atu halo estudu DED bá ponte Loes iha tinan oin 2022, tanba dadaun ne’e MOP esforsu atu prienxe rekizitu impréstimu husi ADB ho banku mundiál nia.
“Maibé husi parte Obras Públikas tau ona prioridade design detalladu iha tinan 2020 ho kustu orsamentu $ 1.4 milloens. Ne’ebé orsamentu sei finansia husi impréstimu, tanba ne’e mak Obras Públikas sei prienxe ne’ebé ADB, Work Bank presiza atu kompleta husi Obras Públikas,” dehan Vise MOP, Nicolau Lino Freitas Belo, iha MPO Fatuhada, Dili, Kuarta-feira ne’e.
Nicolau Lino Freitas Belo hatutan, ponte Loes ne’e kleur tebes ona, tan ne’e, presiza halo estudus DED hodi konstrui fali ponte Loes foun atu bele asegura utilizasaun bá tempu naruk.
“Planu liu husi estudus mak haree para nune’e bele fila-fali bá ponte foun bá iha longu prazu ninian, mais agora dadauk kontinua uza, depois planu 2022 tinan mak ita planu atu halo estudus bá DED,” dehan nia.
Bá tempu badak nian, Governante ne’e relata, oras ne’e daduak, orienta ona Institutu Jestaun Ekipamentu (IJE) atu halo normalizasaun bá bee dalan iha ponte Loes, atu bee labele estraga ponte refere.
Nune’e bele uza temporáriu atu fasilita movimentasaun transporte públiku diresaun Dili bá Batugade Mota-ain no Bobonaru.(ant)
Komentariu