Asumano Isolado: Komunidade Husu Ponte no Eletrisidade, MOP-ADN Tun Direita
Smnewstl.com | Liquica, 20 Abril 2026 – Komunidade iha Suku Asumano husu urjente ba Ministériu Obras Públikas atu konstrui ponte no fornese eletrisidade, tanba difikuldade boot ne’ebé kontinua impede asesu no moris di’ak ba populasaun.
Durante vizita Ministériu Obras Públikas, ne’ebé akompaña husi ekipa Azensia Dezenvolvimentu Nasionál (ADN) iha Suku Asumano, Postu Administrativu Likisa, Munisípiu Likisá, iha Sabadu liubá, xefi suku Paulo dos Santos hateten katak durante tinan barak ona komunidade sei enfrenta problema boot relasiona ho estrada aat, falta ponte no asesu ba eletrisidade.
Lideransa lokal haktuir katak situasaun ne’e halo komunidade isoladu no difisil atu asesu servisu básiku no merkadu. Tanba ne’e, sira husu governu liu husi MOP atu tau atensaun urjente ba problema hirak ne’e.
Hatan ba preokupasaun hirak ne’e, Ministru Obras Públikas, Samuel Marçal, confirma katak iha tempu badak MOP ho ADN sei haruka ekipa tékniku tun ba terrenu atu halo observasaun direta no avalia kondisaun estrada no ponte iha área ne’e.
Ministru mos husu komunidade atu koopera ho ekipa tékniku durante prosesu estudu, atu garante planu dezenvolvimentu ne’ebé loos no responde ba nesesidade real iha terrenu.
Prezidente Autoridade Munisípiu Likisá mos iha esperansa katak projetu ne’e sei tama iha prioridade governu iha tempu badak, no apela ba komunidade atu kontinua pasiénsia no suporta prosesu dezenvolvimentu.
Enkuantu ne’e, Suku Asumano kompostu husi aldeia ha’at ho populasaun liu rihun ida resin, maioria depende ba agrikultura. Maski iha potensia produtu lokal barak, maibé difisil atu lori ba merkadu tanba kondisaun estrada ne’ebé ladún di’ak. (/SMnews)
Komentariu