Smnewstl.com (Dili) — Unidade Movimentu Demokrátiku Patriótiku (UMDP), hamutuk ho nia membru sira husu Polísia Nasionál Timor-Leste (PNTL) ho Ministériu Públiku (MP) atu halo investigasaun bá autór ne’ebé baku Leandro Xena iha Bebora kinta loron 5 fulan-augustu foin lalais ne’e.
Prezidente Movimentu Akadémiku Pro-konstituisaun (MAPK), Hugo Lourenço hateten, sira kondena makas aktu krime hasoru Prezidente Movimentu Brigada Apoiu Xanana, Leandro Xena, tanba ne’e krime.
“Tanba ne’e mak ami hanoin katak, prosesu ne’e la’o, ami kondena, asaun krime ita kondena krime ne’e la di’ak, maibé husik bá prosesu la’o, polísia mak iha kompeténsia, ministériu públiku sira mak iha funsaun atu rezolve problema,” dehan, Hugo Lourenço, sesta (06/08/21) iha sede PST Balide, Dili.
UMDP ho nia asosiasaun membru sira hanesan, LJEP, MPAK, CRN 1, MNJP, MOKATIL, MBX no ACBN hato’o solidariedade bá Prezidente MBX, Leandro Xena, no husu autoridade kompetente atu loke investigasaun kle’an hodi hatene motivu husi akontesimentu ne’e.
“Ha’u hanoin entrega bá polísia, ha’u hanoin sira-ne’e koñese malu, pode ser que investigasaun mak hatene, ami ohin hato’o de’it ami-nia sentimentu solidariedade hanesan timoroan, sira-ne’ebé balun mós ema timoroan, sira-ne’ebé hetan agresaun ne’e mós timoroan,” sujere nia.
Ho akontesimentu ne’e, UMDP husu timoroan hotu atu respeita malu, no kria páz, tanba diferénsias polítika normál iha nasaun ne’ebé opta sistema demokrátiku hanesan Timor-Leste.
Kona-ba problema ne’e diskonfia iha ligasaun polítika husi partidu balun, Hugo Lourenço, afirma, partidu la haruka nia militante no apoiante sira atu baku malu.
Maibé, problema ne’ebé mosu mai husi ema indivídu sira no la reprezenta partidu, tanba partidu seidauk ema ida atu halo krime.(ant)
Komentariu