SMnewstl.com ||DILI, 14 Agostu 2026-Primeiru-Ministru (PM), Kay Rala Xanana Gusmão, hato’o agradesimentu ba INTERPOL tanba apoiu ne’ebé fó ona ba Polísia Siéntifika Investigasaun Kriminál (PCIC) iha esforsu hodi kombate no sobu rede scam online iha Timor-Leste.
PM Xanana hato’o agradesimentu ne’e durante hasoru malu ho ekipa INTERPOL iha edifísiu PCIC, Colmera, Dili, iha Sesta (14/08).
“Ha’u mai hasoru malu ho ekipa INTERPOL. Ema sira ne’e mai hosi França, Xina, Hong Kong. Sira mai ajuda malu ho sira iha PCIC hodi haree buat hotu ne’ebé ligadu ba cybercrime, ne’ebé iha diskusaun lubuk ida. Sira fila depois sira sei mai fali,” PM Xanana hateten.
PM Xanana hateten, prezensa no kooperasaun INTERPOL nian hatudu katak Timor-Leste komesa prepara an di’ak liu atu hasoru krime organizadu, liu-liu krime ne’ebé uza teknolojia no atividade online ilegál.
“Iha ami-nia diskusaun, sira fó hatene katak problema teknolójia foun ne’e lori benefísiu oit-oan, maibé lori dezafiu barak tebetebes. Sira promete atu mai nafatin apoia, tanba sira haree ita mós nu’udar membru ASEAN,” Xefe Governu afirma.
Xefe Governu mós subliña katak Timor-Leste iha esperiénsia kona-ba krime transnasionál, inklui tráfiku droga, ne’ebé iha tinan 10 liubá uza Timor-Leste nu’udar rota tranzasaun ba Indonézia.
Tanba ne’e, liuhosi kooperasaun intelijénsia ho Indonézia, autoridade sira konsege kaer no kontrola atividade ne’e.
Agora, Governu mós konsidera krime online hanesan dezafiu ida ne’ebé presiza resposta forte, liu-liu tanba Timor-Leste foin sai membru foun ASEAN no kriminozu sira bele aproveita fraqueza iha sistema foun.
“Tanba ne’e mak ha’u mai agradece ba sira, ko’alia ho sira, no sira mós iha ona kooperasaun di’ak ho PCIC. Sira sei mai beibeik,” PM Xanana konklui.
Iha Hasoru malu ne’e akompaña mós hosi Diretór PCIC, Vicente Brito.(/SMnews)
Komentariu