Smnewstl.com | Dili, 11 Maiu 2026 – Polísia Nacional de Timor-Leste (PNTL) liu husi Komandu Munisipiu Lautém detein ona suspeitu na’in 10 relasiona ho kazu konfrontu ne’ebé rezulta ema ida mate no ida seluk kanek todan iha festa koremetan iha Aldeia Poros, Suku Mehara, Postu Administrativu Tutuala, Munisípiu Lautém.
Akontesimentu ne’e mosu iha madrugada loron 09 Maiu 2026, bainhira festa família ida ne’ebé envolve atividade tradisionál “koremetan” sai husi kontrolu tanba konfrontu entre grupu rua.
Tuir informasaun, grupu ida mai husi Suku Asalaino mak envolve iha vizita ba atividade familia iha Poros.
Liu husi konferensia imprensa, Porta-voz Polísia Nacional de Timor-Leste (PNTL), Superintendente Xefe Polísia João Belo dos Reis, hateten katak konflitu ne’e evolui ba violénsia física ne’ebé rezulta vítima fatál Vicêncio Fernandes no ema seluk hetan kanek todan.
Polísia halo intervensaun lalais no, ho koordenasaun ho forsa seguransa seluk, inklui FALINTIL-Forças de Defesa de Timor-Leste (F-FDTL), konsege kaptura suspeitu na’in 10 iha fatin akontesimentu.
“Polísia halo kedas atuasaun no koordenasaun ho F-FDTL tanba iha indikasaun katak elementu balun bele envolve. Resultado operasaun ne’e detein suspeitu na’in 10,” dehan porta-voz PNTL.
Kazu ne’e rejista ho númeru referénsia NUC.0028/2026/LSIK no klasifika hanesan Omesídíu Agravadu tuir artigu 140, 145, 146, 185 no 260 husi Kódigu Penal.
Relasiona ho kazu ne’e, Komandu FALINTIL-Forças de Defesa de Timor-Leste (F-FDTL) informa katak sei aplika medida rigrozu hasoru membru sira ne’ebé deskonfia envolve.
Xefe Estado-Maior General Forsa Armada, Tenente General Domingos Raul Falur Rate Laek, deklara katak prosesu investigasaun sei la’o tuir mekanizmu legal no disiplina militar.
Domingos Raul Falur Rate Laek hateten katak F-FDTL seidauk simu relatóriu kompletu, maibé valoriza intervensaun lalais husi PNTL.
“Bainhira iha prova klaru kona-ba involvimentu membru F-FDTL, sei aplika medida disciplinár, inklui suspensaun ka desliga tuir desizaun tribunal kompetente,” nia esklarese.
Tuir relatóriu preliminár, konflitu ne’e bele mosu husi dezentendimentu entre grupu sira durante atividade koremetan, ne’ebé depois evolui ba konfrontu fizikál iha tempu kalan.
Autoridade seguransa sira kontinua halo investigasaun atu apura motivu kompletu no responsabiliza ema hotu ne’ebé envolve iha kazu ne’e.(SMnewstl/)
Komentariu