SMnewstl.com | Baucau, 27 Abril 2026 – Governu liu husi Ministériu Agrikultura, Pekuária, Peskas no Floresta (MAPPF), lidera husi Ministru Marcos Mameta da Cruz, ofisialmente hala’o lansamentu utilizasaun makina modernu ba kuda hare iha natar Suku Seiçal, Munisípiu Baucau.
Inisiativa ida ne’e realiza husi Grupu Daitula, ne’ebé kompostu husi veteranu reformadu husi F-FDTL nain lima, ho objetivu atu hasa’e produtividade agrikultura no kontribui ba dezenvolvimentu setór agrikultura iha rai.
Iha entrevista, Ministru Marcos Mameta da Cruz hateten katak MAPPF fó apresiasaun ba esforsu Grupu Daitula ne’ebé kontinua iha vontade atu servisu no kontribui ba dezenvolvimentu nasionál, liuliu iha área agrikultura, pekuária, peskas no floresta.
“Ha’u hanesan responsavel ba área agrikultura, fó apresu ba grupu Daitula ne’ebé sei hakarak kontinua kontribui ba dezenvolvimentu rai,” hateten Ministru.
Relasiona ho pedidu husi grupu, MAPPF kompromete atu apoiu ekipamentu agrikultura modernu, inklui Makina koa hare’e ida,Makina kuda hare’e rua,Trator rua.
Iha sorin seluk, reprezentante Grupu Daitula, Manuel Soares “Maulindu”, agradese ba apoiu ne’ebé MAPPF fó, liu-liu lansamentu utilizasaun makina modernu ne’ebé ajuda barak iha prosesu kuda hare.
“Ami kontente no agradese tanba makina modernu ida ne’e ajuda teb-tebes ami iha servisu kuda hare,” dehan Maulindu.
Nia mos husu atu Governu kontinua fó apoiu ekipamentu seluk hanesan trator no makina agrikultura atu fasilita servisu iha futuru.
Agora daudaun, Grupu Daitula iha membru nain lima no planeia atu aumenta to’o ema nain 26. Sira konsege ona prepara natar ho luas entre hektare 4 to’o 6 iha Suku Seiçal.
Inisiativa ida ne’e espera bele sai hanesan ezemplu ba grupu agrikultór seluk iha rai laran atu uza teknologia modernu hodi hasa’e produtividade no garante seguransa alimentár. (/SMnews)
Komentariu