SMnewstl.Com DILI | 14 Abril 2026 – Seksaun Investigasaun Kriminál (SIK) Komandu Polísia Nasionál Timor-Leste (PNTL) Munisípiu Dili ho apoiu husi Diresaun Servisu Investigasaun Kriminál (DSIK) Nasionál, Tersa-feira, (14/04/2026), ezekuta mandadu judisiáriu husi Tribunál Judisiál Primeira Instánsia Dili ho Númeru Úniku Kazu (NUC) 0010/24.CVTDD, hodi hala’o aprensaun ba autokarru ida ne’ebé uza husi estrutura Federação Futebol Timor-Leste (FFTL) iha sede sentral FFTL, Bairo dos Grilos, Dili.
Aprensaun ne’e liga ho kazu dívida antigu husi estrutura FFTL sesante, ne’ebé akumula entre tinan 2021 to’o 2024. Iha períodu ne’ebá, lideransa FFTL trata viajen selesaun nasionál sira atu partisipa iha kompetisaun internasional no halo dívida bilete aviaun ho KOFY Ajénsia. Maibé, to’o ohin loron dívida refere seidauk selu.
Tanba situasaun ne’e, kompania ajénsia tiket nian lori kazu ne’e ba tribunal. Ikus mai, tribunal fó despaxu atu halo penhor ba veíkulu sira nu’udar garantia ba prosesu legal tuir mai,Veíkulu sira ne’ebé hetan mandadu penhor mak, Mini bus ho xapa matríkula A-23-567-TL,Autokarru ho xapa matríkula 59-240-TL.
Adjuntu Sekretáriu FFTL, Fernando Baptista Xavier, konfirma katak asaun hosi ekipa DSIK ne’e parte ida hosi prosesu legal ne’ebé lao hela atu klarifika responsabilidade ba dívida sira ne’ebé estrutura sesante sira halo durante mandatu.
“Ida ne’e kazu dívida tuan ne’ebé seidauk hetan solusaun. Agora autoridade sira mai ezekuta mandadu tribunal atu hala’o prosesu legal. Aprensaun ba bis ne’e liga ho kazu ne’ebé estrutura sesante sira halo entre tinan 2021 to’o 2024 ho KOFY Ajénsia,” dehan Fernando ba jornalista sira iha sede FFTL, Bairo dos Grilos, tersa ne’e.
Fernando subliña katak tanba kazu ne’e seidauk rezolve, tribunal foti desizaun atu halo aprensaun ba bus FFTL ida, no autoridade sira sei kontinua buka mini bus ida seluk nia paradeiru.
Kareta bus FFTL ne’ebé autoridade sira aprende ona, agora submete ba Komandu PNTL Munisípiu Dili hodi hein prosesu legal tuir mai. (/SMnews)
Komentariu