SMnewstl.com 11 Maio 2026- Tekniku Laboratóriu Ajensia Dezenvolvimentu Nasionál (ADN, I.P),hamutuk Ho Tekniku Ministériu Obras Públikas (MOP), hala’o monitorizasaun ba projetu konstrusaun moru protesaun konkretu Cyclop iha Mota Camea, Suku Camea, Postu Administrativu Cristo Rei, Munisípiu Díli.
Monitorizasaun ne’e realiza hanesan parte husi kontrolu kualidade no supervizaun téknika atu asegura katak implementasaun obra lao tuir dezeñu, espesifikasaun no padraun konstrusaun ne’ebé estabelese ona iha kontratu.
Durante monitorizasaun, ekipa konjunta identifika katak parte balun husi servisu ne’ebé kompaña implementadóra Luckstar hala’o la tuir espesifikasaun téknika, liu-liu kona-ba kompozisaun material, arranju fatuk Cyclop no métodu aplikasaun konkretu.
Tekniku Laboratóriu ADN Raimero Maia Sanches,Komfirma katak ADN no MOP deside atu halo intervensaun direta tanba servisu ne’ebé hala’o la tuir estandar ne’ebé determina ona.
“Nia kauza ne’e, ami husi ekipa ADN no Obras mai hare’e katak kompaña Luckstar nia servisu la tuir espesifikasaun no estandar ne’ebé ami fó ona. Tanba ne’e, parte obra hamutuk metru 81 ne’ebé la tuir padraun mak ami deside atu sobu hikas,” dehan Raimero.
Raimero mós husu ba kompaña Luckstar atu aumenta tan pesoál tékniku sira atu bele garante servisu ho kualidade no tuir padraun tékniku ba moru protesaun refere.
Iha parte seluk Enjineiro ADN Vidal Guteres, konfirma mos katak ADN no MOP hala’o intervensaun direta ba parte projetu moru protesaun hamutuk metru 81 ne’ebé la tuir espesifikasaun téknika.
“Ohin ami sobu distánsia metru 81 ida ne’e la’ós tamba servisu la halo tuir dezeñu de’it, maibé antes sira kontinua servisu liu tan, ami orienta atu sobu kedas no hadi’a kedas para aban-bainrua problema hanesan ne’e labele akontese tan,” dehan Vidal.
Vidal esplika tan katak kona-ba utilizasaun simentu no fatuk, tuir padraun tékniku tamañu fatuk ne’ebé uza ba konstrusaun Cyclop tenke entre sentímetru 20 to’o 30. Maibé, iha implementasaun ne’e, balun husi fatuk sira boot liu padraun ne’ebé permite. Tanba ne’e, ekipa tékniku orienta kompaña atu halo breaker ka fahe fatuk sira sai ki’ik liu atu bele uza tuir estandar ne’ebé estabelese ona.
Atualmente, total konstrusaun moru protesaun refere sei restu hela metru 250 atu kontinua implementa. Parte metru 81 ne’ebé la tuir espesifikasaun sei hadi’a hikas, no projetu refere previstu atu finaliza iha fulan Juñu tinan ida ne’e.(SMnewstl/)
Komentariu