Smnewstl.com | Ainaro, 15 Agostu 2026 — Ministru Obras Públikas, Samuel Marçal, hamutuk ho ekipa téknika, halo vizita no observa diretamente progresu obra infraestrutura urbana iha Munisípiu Ainaro.
Ministru Samuel Marçal hateten katak Ainaro iha potensial turístiku boot, tanba natureza no paisajen ne’ebé furak. Nune’e, hadi’a infraestrutura, liuliu estrada, sei ajuda promove no fasilita dezenvolvimentu turizmu iha munisípiu ne’e.
“Ha’u mai iha fatin ne’e hamutuk ho ekipa téknika hodi observa servisu urbana iha Ainaro, ne’ebé iha beleza furak tebes. Tanba ne’e, bainhira ita hadi’a estrada, ita mós promove fatin turístiku sira iha Ainaro,” dehan Ministru Samuel Marçal.
Projetu estrada ne’e iha naruk hamutuk 12 quilómetru, ho kontratu ne’ebé foin asina iha fulan hirak liubá. Maibé, implementasaun projetu hasoru dezafiu tanba tama ona iha tempu udan, ne’ebé halo servisu para durante semana tolu. Kompanhia mós presiza tempu atu mobiliza ekipamentu ba área projetu.
Ministru Samuel Marçal hateten katak, maski progresu obra seidauk aas, Governu kontinua halo esforsu atu garante ezekusaun projetu la’o tuir prazu no kondisaun kontratu.
Ministru mós husu ba kompanhia atu aumenta oras servisu, inklui instala iluminasaun ka lampu, atu traballadór sira bele kontinua servisu to’o kalan bainhira presiza.
Depois husi Ainaro, Ministru Obras Públikas sei kontinua monitoriza projetu reabilitasaun estrada iha Kassa, Zumalai, Maukatar, Suai Vila no Betano. Iha fatin balun ne’ebé konsidera grave, ekipa téknika sei halo avaliasaun hodi prepara dezenhu no solusaun téknika apropriadu.
Representante Companhia Fortuna Star hateten katak kontratu projetu ne’e komprende servisu iha área urbana no estrada sira iha parte ninin. Lansamentu ne’ebé hala’o antes ne’e iha natureza simbóliku, enkuantu servisu tékniku kontinua tuir dezenhu no planu implementasaun projetu.
Kompanhia klarifika katak, to’o agora, servisu iha área urbana laran seidauk tama hotu tanba tuir dezenhu, servisu baleta no drenajen tenke hala’o uluk antes atu tama ba parte seluk husi obra.
“Lansamentu ne’e mak simbóliku deit, maibé servisu iha estrada no área ninin sira lao hela. Ba área urbana laran, servisu seidauk tama hotu tanba tuir dezenhu, ami tenke halo baleta uluk,” dehan reprezentante Companhia Fortuna Star.
Kompanhia hateten katak atualmente progresu servisu atinji aproximadamente 9%, liuliu iha parte drenajen. Servisu mós hala’o iha pakote ida ne’ebé envolve Suku Manutasi, Suku Soro no Suku Ainaro, ho pakote sira seluk ne’ebé sei kontinua tuir planu implementasaun.
Durante implementasaun projetu, kompanhia enfrenta mós dezafiu sosial, inklui asuntu kona-ba traballadór sira ne’ebé afetadu no fornecimentu materiál. Materiál balun ne’ebé produs iha Dili tenke transporta mai Ainaro. Maibé, kompanhia hateten katak sira hetan koperasaun di’ak husi autoridade lokál sira.
Kondisaun klima, liuliu udan boot, mós sai dezafiu prinsipál ba implementasaun obra, tanba bainhira udan servisu balun labele kontinua. Kondisaun ne’e bele afeta kualidade no ritmu ezekusaun projetu.
Companhia Fortuna Star esplika katak lansamentu projetu hala’o iha fulan Fevereiru, enkuantu dezenhu kompleta iha fulan Abril. Kompanhia komesa mobiliza no prepara ekipamentu sira atu kontinua servisu, no servisu efetivu komesa la’o di’ak liután iha fulan Julho no Agosto, bainhira ekipamentu sira kompleta ona iha fatin.
Tuir kontratu, projetu estrada Ainaro ne’e iha durasaun fulan neen (6).
Companhia Fortuna Star garante katak sei halo esforsu máximu atu kompleta projetu no entrega obra tuir prazu no kondisaun kontratu ne’ebé asina ona.(/Smnews)
Komentariu