Smnewstl.com 27-09-2024 (Nova Iorke) – Pessoa eminente organizasaun internasionál g7+ atuál Primeiru-Ministru (PM), Kay Rala Xanana Gusmão ho Prezidente Aliansa Lideransa Mundiál-Clube Madrid (WLA-CdM), hala’o diskusaun kona-bá estabelesimentu kooperasaun iha futuru.
Iha enkontru ne’e, Pessoa eminente g7+ Xanana Gusmão akompañadu hosi Reprezentante Permanente Timor-Leste iha ONU, Dionísio da Costa Babo Soares no Sekretáriu Jerál g7+ Helder da Costa, Misaun Permanente Timor-Leste nian iha Nova Iorke.
Durante enkontru, parte rua esplora kooperasaun potensiál sira entre WLA-CdM no g7+ nu’udár organizasaun ida ne’ebé kompostu hosi nasaun frázil 20, hodi fahe esperiénsia kona-bá páz, justisa no hametin instituisaun.
Xanana Gusmão agradese tebes tanba diskusaun la’o di’ak, konsentradu no ko’alia liu kona-bá demokrasia iha nasaun sira g7+ inklui harii instituisaun sira ne’ebé metin iha nasaun frázil sira.
Hanesan fórum boot liu iha mundu, ne’ebé halaibur eis-Xefe Estadu no Xefe Governu sira, WLA-CdM buka atu promove demokrasia no luta bá mudansa globál.
WLA-CdM harii iha tinan 2001, organizasaun ne’e kompostu hosi membru na’in-126 hosi nasaun-73, inklui Pramiadu Nobel Dame nian, eis-Xefe Estadu no Eis Xefe Governu sira.
Objetivu hosi WLA-CdM aliña ho g7+ hodi halo parseria potensiál ida-ne’ebé buka atu haburas demokrasia no estabilidade iha nasaun vulnerável sira.
WLA-CdM kontinua promove valór demokrátiku no governasaun di’ak, parseria ida-ne’e iha potensiál atu fó impaktu pozitivu bá ema millaun-resin nia moris iha mundu tomak.
Enkontru amizade ne’e taka ho entrega prendas simbólika nu’udár agradesimentu ida mós hosi Governu Timor-Leste (TL). (*/Smnews)
Komentariu