Smnewstl.com | Dili, 15-04-2026 – Prezidente Repúblika, José Ramos-Horta, alerta katak Timor-Leste enfrenta krize enerjia ne’ebé grave no imediatu, tamba sistema eletrisidade nasaun nian depende ho totalidade ba diesel importadu, no presu global ne’ebé sae maka’as ameasa diretamente moris povu no estabilidade ekonomia.
Iha diskursu ida iha AZEC Online Summit ne’ebé lidera husi Japaun, Prezidente Horta hateten katak situasaun enerjia iha Timor-Leste la’ós de’it problema abstratu, maibé realidade ne’ebé povu sente loron-loron.
Prezidente esplika katak governu sosa ona rezerva diesel adisionál hamutuk litru milyon 80 ho kustu to’o dólar milyon 170, hodi asegura fornesimentu eletrisidade kontinua iha nasaun.
Nune’e mos, governu implementa ona kontrolu presu no prepara planu kontijénsia inklui rasionamentu se’e situasaun agrava.
“Medida sira ne’e fó tempu de’it, la’ós solusaun duradoura,” hateten Horta.
Iha diskursu ne’e, Prezidente mos simu ho di’ak proposta Japaun nian ne’ebé oferese abordagem rua: responde ba krize imediatu no mos haree ba vulnerabilidade estrutural iha setor enerjia.
Horta subliña katak asesu ba finansiamentu ba sosa kombustível no fortalesimentu cadeia fornesimentu importante tebes ba nasaun ki’ik hanesan Timor-Leste, hodi proteje uma-kain no garante seguransa alimentár.
Iha tempu médiu no naruk, Prezidente destaca importánsia investimentu iha enerjia renovável atu reduz dependénsia ba diesel importadu, ne’ebé konsidera hanesan nesesidade ekonomika no estratéjika.
Nia mos hateten katak ho apoiu husi Japon, ona instala sistema enerjia solár iha área rurál sira, no agora Timor-Leste iha progresu ba dezenvolvimentu sentral eletrika solár boot ida ho investimentu konjuntu husi empresa Japon Itochu no Électricité de France.
Iha remata diskursu, Prezidente reafirma katak Timor-Leste prontu atu servisu hamutuk ho Japon, parseiru ASEAN no komunidade internasionál atu enfrenta krize enerjia no avansa tranzisaun enerjia iha futuru.” (/SMnews)
Komentariu