Smnewstl.com 13-07-2023 -Programa Nono Governu ne’e entrega direita hosi Vice Ministru Asuntu Parlamentar, Aderito Hugo da Costa ba Prezidente Parlamentu Nasionál, Maria Fernanda Lay, iha resintu, Parlamentu Nasionál.
Tuir komunikadu ne’ebe Smnews asesu komfirma, Programa ne’ebe entrega hafoin aprova liu hosi reniaun Konsellu Ministrus iha loron kuarta-feira (12/07/23), ne’e sintetiza polítikas públikas prinsipáis ne’ebé atu adopta durante Governu ninia mandatu.
“Ami submete ona programa ba Parlamentu Nasionál, tanba hare ba sirkuntansia oin-oin ho nesesidade atu governu ne’e entrega ninia atividade atu hala’o servisu ho lalais hafoin hetan aprovasaun hosi Konsellu Ministru,” dehan Aderito Hugo da Costa.
Programa ne’e Governu Konstitusionál IX ho pajina 170 kompoin husi área prinsipál neen, hanesan, afirma filafali Estadu Direitu Demokrátiku, dezenvolvimentu kapitál sosiál, dezenvolvimentu infraestruturas, dezenvolvimentu ekonomia, konsolidasaun governativa no boa governasaun, no kombate hasoru korrupsaun.
Programa hirak ne’e governu halo ho objetivu atu hametin no otimiza setóres governasaun nian no sira nia rekursu, hodi habadak dalan atu transforma vizaun Ajenda Dezenvolvimentu Sustentavel 2030 nian no Planu Estratéjiku Dezenvolvimentu 2011 – 2030 nian hodi sai realidade.
Konsellu Ministrus delibera ona mós aprezenta ba Parlamentu Nasionál Votu Konfiansa ida ba Governu, ne’ebé fundamenta husi kompromisu ne’ebé firme no determinadu Governu atu implementa ninia Programa, ho objetivu atu promove dezenvolvimentu, prosperidade no moris diak ba sidadauns timoroan.
Hafoin simu programa, Prezidente Parlamentu Nasionál, Maria Fernanda Lay deklara meja Parlamentu Nasionál sei halo agenda hodi halo debate iha semana ne’e. (**)
Komentariu