Smnewstl.com 13-12-21 (Dili) — Kazu Topu Honis ne’ebe involve eis Padre Richard Dasbach diskumfia halo abuzo sexual hasoru minoridade iha orfaun Topu Honis rasik tama ona ba prosesu final nune’e Tribunal Distrital Oecusse sei anunsia desizaun iha loron 21 Dezembro 2021.
Ba desizaun final ne’e, Vise Prezidente Parlamentu Nasionál (PPN), Maria Angelina Sarmento husu ba entidade hotu atu simu desizaun Tribunal hodi la halo ameasa bá vítima, suspeitu inklui autór judisiáriu sira.
“Atu hato’o mensajen katak, independentemente bá desizaun saida de’it mak Tribunál foti husu atu entidade sira hotu tenki hakruk no respeita, labele iha ameasas ga intimidasaun bá autór judisiáriu sira, no reprezentante vítima no bá labarik, joven feto no mane, membru komunidade no sé-sé de’it mak involvidu iha prosesu ida-ne’e,” dehan Vise PPN, Maria Angelina Sarmento, Plenária PN, Segunda-feira horseik.
Reprezentante povu ne’e afirma, bainhira entidade hotu simu desizaun mak sei kontribui bá haforsa liután estadu direitu demokrátiku atu nune’e bele respeita justisa hodi kontribui haforsa estadu de direitu demokrátiku.
“Nne’e mak mensajen ne’ebé ami hakarak hato’o, tanba iha ámbitu diskusaun Tribunál nian, no mós momentu hanesan semana-oin sei iha desizaun husi Tribunál bá kazu ne’ebé mak ita hotu akompaña muito bem iha Oe-cusse,” apela nia.
Entretantu tuir informasaun ne’ebe iha posibilidade Kay Rala Xanana Gusmao sei partisipa iha julgamentu final tamba akompanha prosesu ne’e ho diak no hakarak atu hatu’ur justisa ho lolos.
Durante prosesu julgamentu, Kay Rala Xanana Gusmao sempre halo akompanhamentu inklui mos sai sasin ligado ho relatorio investigasaun Komisaun Justisa e Paz liderado Padre Herminio Goncalves ne’ebe ‘koak’ ba publiku. Tuir Padre Herminio, relatorio investigasaun intrega ida ba Kay Rala Xanana Gusmao ho kapasidade hanesan lider nacional hodi akompanha prosesu ne’e. Enkuanto dokumentus ne’e sai fali ba publiku Tribunal notifika kedas Padre Hermino no Kay Rala Xanana Gusmao hanesan sasin, ne’ebe nia prosesu remata ona iha fulan tolu liu ba.
Kay Rala Xanana Gusmao nia prezensa iha julgamentu ba kazu Dasbach rasik hanesan reafirma ona antes katak, laos atu halo intervensaun ba prosesu judisial, maibe hakarak hatur justisa ho lolos.
Enkuanto prosesu ba kazu ne’e lidera husi Juiz Kolektivo Yudit Pamukas, Hugo da Crus Pui no Evangelino Belo. Ministerio Publiku reprezenta husi Matias Soares.
Eis Padre Dasbach hetan asistensia legal husi advogado Eusebio Guterres, Miguel Faria, Pedro Aparico inklui advogado rua seluk tan. (ant)
Komentariu