Smnewstl.com 13-12-21 (Dili) — Empreza operadór Telekomunikasaun Timor Telecom (TT), oferese fasilidade karregamentu eletróniku bá kliente sira iha loja TT iha Timor laran tomak hodi karrega pulsa, tanba pulsa fíziku TT dólar $ 1 nian seidauk iha.
Chief Information Officer (CIO) Timor Telecom,Ladislau Saldanha klarifika, informasaun ne’ebé lansa iha públiku katak, pulsa TT lakon kuaze rihun 40 ne’e laloos.
Larislau rekuiñse, stok pulsa presu dólar $ 1 nian fízikamente mak laiha duni. Sira order ona, maibé seidauk to’o Timor-Leste, tanba kauza mós husi pandemia Covid-19.
“Pulsa $ 1 dólar laiha talves dehan loos mós, talves mós la’e, ida laiha ne’e pulsa fíziku, ida koir ne’e, maibé Timor Telecom iha fasilidade karregamentu pulsa eletrónika ne’ebé iha loja TT sira-ne’e hotu permite atu halo karregamentu husi valór $ 1 dólar nian,” dehan CIO TT, Ladislau Saldanha, bá Smnewstl via telefóne segunda ne’e.
Nia hatutan, TT mós oferese tan produtu pulsa lais bá kliente sira, tanba pulsa lais ne’e permite ajente sira haruka pulsa kliente ne’ebé presiza.
Enkuntu, TT mós oferese tan produtu haruka pulsa bá kliente sira, ne’ebé sei haruka entre kliente ida bá kliente seluk.
“Iha tan fasilidade seluk baibain naran produtu ne’e pulsa lais, pulsa lais ne’e bele permite ajente haruka pulsa bá kliente ne’ebé mak presiza. Depois iha tan produtu ida fó pulsa, sei permite kliente ida fó fali nia pulsa bá kliente seluk, ne’ebé ida fíziku mak laiha, maibé ida eletrónika ne’e iha fasilidade hira kedas bele permite kliente kontinua hetan servisu,” esplika nia.
Produtu karregamentu eletróniku ne’e iha Munisípiu 12 inklui enklave Oe-cusse, iha loja TT nian, hodi fasilita kliente sira atu karrega pulsa bainhira presiza.
Maski nune’e, Ladislau Saldanha afirma, pulsa fíziku la’ós order husi nasaun Portugál, tanba ho presu ne’ebé karun tebes, tan ne’e, TT order husi nasaun Ázia sira.
Ne’eduni, previstu ona, semana oin bainhira buat hotu la’o di’ak, maka pulsa ne’e to’o ona iha Timor-Leste.(ant)
Komentariu