Smnewstl.com 28-10-2021 (Dili) –Xefe Negosiador Prinsipal ba Delimitasaun Fronteira Maritima, Kay Rala Xanana Gusmao sente triste tamba lakon ona belun diak jornalista Max Sthal.
Iha ninia karta offisial ba familia ne’ebe SMnews asesu komfirma, ho sentimentu triste Eis Komandante Eim Xefe das Falintil dehan, Max hanesan eroi ba povu Timor Leste.
“Max Sthal, jornalista ida nebe brani tebes fo sai ba mundo situasaun ne’ebe akontese iha Timor Leste. Ho nia brani maka halo mudansa ba situasaun iha ita nia nasaun,”hato’o Xanana.
Nia hatatan, liu husi publikasaun Max Sthal nian maka mundo deskobre asasinatu husi Militar Indonesia ba povu Timor Leste liliu Maskre Santa Cruz 1991, ne’ebe rezulta ema barak lakon vida.
“Masakre Santa Cruz maka loke mundo nia matan ba prosesu foun ida hodi halo mudansa ba rai ida ne’e,” hatutan Xanana
Eis Presidente Republika no Primeiro Ministro ne’e rekuinese, papel Max nian la hotu deit iha masakre 12 Novembro 1991, maibe mos iha ukun a’an, Max oferese a’an tomak ba prepara dokumentus kona ba istoria luta Timor Leste nian liu husi hamahan a’an Centro Audio Visual Timor Leste (CAMSTL)
Max hetan kondekorasaun husi estado Timor Leste ho Orde Timor no nia kontribuisaun rasik sai kuinesidu no povu Timor Leste hadomi tebes nia.
Hau sente lakon tebes Max Sthal no susar tebes atu haluha nia kontribuisaun. “Max iha Povu Timor Leste nia fuan no nia kontribuisaun metin iha ita nia fuan,”haktuir Xanana.
Hau hato’o sentidu kondelensia klean tebes ba familia kuando hanoin hikas buat saida maka Max halo ona mai ita. Adeus Max, o isin maka mate, maibe o nia istoria metin iha ami fuan no sei konta husi jerasaun ba jerasaun.
Max Sthal rasik hakotu i’is dader ne’e iha Hospital Bribane Australia tuku 4.30 dadersan.
Aliende Xanana Gusmao, Premiado Nobel da Paz inklui povu Timor Leste mos hato’o sentidu kondolensia ne’ebe nakonu iha media social facebook tamba konsiderado lakon tebes Max Sthal. (Rio)
Komentariu