SMnewstl.com VENILALE 08 Maio 2026-Prezidente Repúblika José Ramos-Horta kompromete atu fó resposta urjente ba kondisaun moris susar ne’ebé enfrenta husi idozu António Mira Belo ho nia oan feto Felisberta Pereira Belo, ne’ebé hela iha Aldeia Wai-Tunau, Suku Uma Ana Iku, Postu Administrativu Venilale, Munisípiu Baucau.
Idozu António Mira Belo, ho idade liu tinan 80, sofre difisiénsia grave iha saúde, inklui problema tilun no matan, ne’ebé halo nia labele lao mesak. Kondisaun ida-ne’e halo nia ho nia oan hela iha situasaun vulnerável tebes, la iha uma digno no seguru atu proteje sira husi tempu udan no malirin.
Familia refere durante tinan barak hela iha uma simples ne’ebé la garante kondisaun adekuada, no iha tempu udan sira presiza hela iha kondisaun difisil tebes, inklui toba iha udan laran tanba la iha abrigu ne’ebé seguru.
Hafoin Publikasaun iha media Kona ba situasaun moris familia ne’e , Prezidente Repúblika hatudu imediata preokupasaun no haruka ekipa asesoria ba fatin atu halo avaliasaun direta no fó apoiu emerjénsia.
Asesor Prezidente Repúblika ba Asuntu sosiais ,Quintiliano Monis hateten katak ekipa Prezidénsia halo vizita ba família refere no lori sasan baziku hanesan foos, mina tein, faru no nesesidade urgenti seluk.
Asesor ne’e mós sublinha katak Prezidente sei koordena ho autoridade lokal sira atu garante prosesu legal kona-ba rai no konstrusaun uma digno ba família.
“Primeiru mak tenke koordena ho autoridade lokal kona-ba estatutu rai, hafoin mak bele avansa ba konstrusaun uma digno,” hatete Quintiliano Monis.
Iha sorin seluk, Xefe Suku Uma Ana Iku Antoninho da Costa Freitas agradese ba intervensaun Prezidente Repúblika, no promete katak suku sei akompaña prosesu ajuda ne’e ho urjénsia.
“Proposta no pedidu kona-ba ajuda ba família refere ami komesa prosesu ona no sei halo ho responsabilidade,” nia hateten.
Kazu ida-ne’e hatudu realidade moris susar ne’ebé enfrenta husi komunidade vulnerável sira iha zona rural, no mós enfatiza nesesidade atu intensifika programa apoiu social no habitação digno iha teritóriu nasional.(SMnews/)
Komentariu