Smnewstl.com 24-09-2021 (Dili) – Lider Nacional, Kay Rala Xanana Gusmao dader ne’e marka ona prezensa iha Tribunal Distrital Oe-cusse hodi akompanha prosesu kontinuasaun ba kazu Topu Honis, diskumfia envolve Eis Padre Dasbach ligado ho abuzo sexual ba orfaun sira.
Prezensa eis Presidente Republika no Promeiro Ministro ne’e atu komfirma mos ninia data fiksu atu sai testamunha ba kazu refere.
Iha biban ne’e marka prezensa mos husi Padre Hermino, ne’ebe Tribunal notifika tamba relatorio investigasaun ba kazu Topu Honis envolve eis Padre Dasbach diskumfia ‘koak’ ba publiku.
Momentu neba, Padre Herminio hanesan Diretor ba Komisaun Justisa e Paz lidera ekipa hodi halo imvestigasaun ba kazu refere, hetan kuinesimentu husi Arse Bisbo Diocese Dili no nia relatorio ida intrega ba Kay Rala Xanana Gusmao ho kapasidade hanesan lideransa nacional.
Tamba relatorio ne’e sai ba publiku, entaun Tribunal mos notifika Padre Hermino no Kay Rala Xanana Gusmao mos sai sasin ba kazu.
Enkuanto ba loron ohin, prezensa Kay Rala Xanana Gusmal nian Xanana nian hodi komfirma data fiksu atu sai testamunha, ne’ebe sei halao iha loron hirak tuir mai.
Ligado ba kazu ne’e, Xanana Gusmao rasik hanesan reafirma ona antes katak, labele hare nia prezensa hanesan atu halo intervensaun ba prosesu judisial, maibe hakarak akompanha hodi hatur justisa ho lolos.
Julgamentu ba loron ohin rasik maka kontinua rona testamunha prinsipal husi ‘mama asrama’, kompostu ema nain 10 resin, hafoin kontinua ba Padre Herminio ho Kay Rala Xanana Gusmao rasik.
Remata komfirma tia orario, Kay Rala Xanana Gusmao mos fila hikas fali Hotel (fatin deskansa).
Antes ne’e, Tribunal mos rona ona testamunha husi Padre SVD inklui Komisaria Direitu Labarik.
Julgamentu ba kazu ne’e lidera husi Juiz Kolektivo Yudit Pamukas, Hugo da Crus Pui no Evangelino Belo. Ministerio Publiku reprezenta husi Matias Soares.
Eis Padre Dasbach hetan asistensia legal husi advogado Eusebio Guterres, Miguel Faria, Pedro Aparico inklui advogado rua seluk tan.(Rio)
Komentariu