SMnewstl.com | Díli, 19 Outubru 2026 — Iha tempu ne’ebé funsionáriu saneamentu sira hala’o knaar atu mantein limpeza no saúde públika iha kapitál Díli, funsionáriu saneamentu na’in tolu hetan agresaun fízika husi ema deskonesidu iha área Raikotu suku KomoroMunisípiu Dili,Asaun ne’e La’ós de’it funsionáriu sira mak hetan kanek, maibé kareta servisu ne’ebé sira uza atu hala’o knaar mos hetan estragu.
Insidente ne’e akontese iha área Pertamina, Mãe da Graça, Raikotu, Díli, bainhira vítima sira lori lixu husi Cidade Díli atu ba fatin depozitu lixu iha Tibar.
Tuir informasaun ne’ebé SMNews hetan, iha grupu ema ida ne’ebé tur hela iha fatin refere. Suspeitu sira alegadamente hahú tuda fatuk ba kareta servisu saneamentu nian, antes halo agresaun fízika hasoru funsionáriu sira.
Agresaun ne’e rezulta funsionáriu saneamentu na’in tolu hetan kanek, inklui kanek iha oin no liman. Vítima sira relata katak, bainhira sira koko atu ajuda malu, suspeitu sira kontinua tuda fatuk, to’o vítima balun monu ba rai.
Carlos Marito dos Santos, hanesan vítima hato’o nia lamentasaun kona-ba akontesimentu ne’e,nk afirma katak sira la’ós bandidu, maibé funsionáriu ne’ebé hala’o servisu hamoos no halibur lixu atu mantein limpeza iha Cidade Díli.
“Ami la’ós bandidu, ami servisu hamoos lixu ba Cidade Díli. Maibé, sira baku ami no uza fatuk atu tuku hau iha oin. Bainhira hau monu ba rai, hau nia ajudante koko atu salva hau, maibé sira kontinua tuda nia ho fatuk, to’o nia liman hetan kanek,” Carlos Marito dos Santos relata.
Nia deklarasaun hatudu sofrimentu ne’ebé funsionáriu sira hasoru bainhira hala’o knaar iha terrenu. Sira nia servisu loroloron importante tebes atu ajuda mantein ambiente moos, hamenus lixu iha dalan no fatin públiku sira, no kontribui ba saúde komunidade nian.
Maibé, insidente ne’e mos hamosu preokupasaun kona-ba seguransa funsionáriu sira ne’ebé hala’o servisu públiku, liuliu bainhira sira tenke viaja iha kalan atu lori lixu ba fatin depozitu. Funsionáriu sira ne’ebé hala’o knaar atu fó benefísiu ba komunidade tenke bele servisu ho seguransa, livre husi ameasa no violénsia.
Vítima sira informa katak sira aprezenta ona keixa kontra suspeitu sira iha Esquadra PNTL Dom Aleixo, Díli. Sira husu autoridade kompetente atu investiga insidente ne’e, identifika ema sira ne’ebé envolve no asegura katak prosesu legal hala’o tuir lei ne’ebé vigora iha Timor-Leste.
Funsionáriu saneamentu na’in tolu ne’ebé sai vítima iha insidente ne’e mak Carlos Marito dos Santos, Leonito Maia no Estevão Maria Martins.
Agora, kazu ne’e hein investigasaun husi autoridade kompetente atu klarifika kauza insidente, identifika suspeitu sira no determina responsabilidade tuir lei.
Insidente ne’e sai hanoin-metin katak seguransa traballadór sira iha servisu públiku tenke hetan atensaun, tanba sira nia knaar loroloron kontribui ba limpeza, saúde no moris di’ak liu ba komunidade. Servisu hamoos cidade mak responsabilidade importante ida, no funsionáriu sira ne’ebé hala’o knaar ne’e merese atu hetan respeitu no protesaun.(#Smnews)
Komentariu