Smnewstl.com 07-09-2021 (Dili) — Komandu Jerál Polísia Nasionál Timor-Leste (PNTL) rejeita ho informasaun ne’ebé espalla iha media sosiál katak, sidadaun ne’ebé mak vasina ho aimoruk sinovac sei la tama iha Munisípiu Ermera ne’e laloos.
Porta-voz Komandu Jerál PNTL, Superintendente Xefe Arnaldo de Araújo klarifika, informasaun ne’ebé lansa iha públiku, kona-ba Komandu Polísia Munisípiu Ermera nia membru balun bandu sidadaun ne’ebé simu vasina Sinovac la tama Ermera, maibé autoriza de’it ne’ebé mak simu vasina AstraZeneca, ne’e laloos.
“Hakarak klarifika de’it informasaun ne’ebé mak viral iha media hatete katak, Komandu Ermera nia membrus balun hateten katak, ema sira-ne’ebé mak vasina Sinovac labele tama iha Ermera, so AstraZeneca mak bele tama, ne’e informasaun ne’ebé mak laloos,” dehan Superintendente Xefe Arnaldo de Araújo, iha komferénsia imprensa Tersa ohin, iha Komandu Jerál PNTL.
Depois de simu informasaun ne’e, Arnaldo de Araújo dehan, Komandu PNTL Munisípiu Ermera, fahe fali informasaun ne’ebé loos katak, bainhira atu halo viajen, presiza lori de’it mak kartaun kinor ne’ebé komprova katak, simu ona vasina dalarua foin bele tama.
“Horseik ha’u kontaktu ho Komandante Munisípiu Ermera dehan katak, ida-ne’e laloos, sira halo tiha klarifikasaun bá ema ida-ne’ebé mak hatete ida-ne’e, depois sira fó fali informasaun bá polísia katak, informasaun sira-ne’e laloos, kuandu tama iha ne’ebá tenki utiliza kartaun vasina, sé mak vasina dalarua okey, sé mak la vasina pasiensia hela lai tuir regras ne’ebé mak governu fó sai,” subliña Arnaldo.
Antes ne’e mós, Ministra Saúde, Odete Maria Freitas Belo klarifika ona katak, vasina sinonav la tama munisípiu Ermera ne’e laloos, tanba ne’e husu sidadaun sira labele fi’ar informasaun falsu sira-ne’e.(ant)
Komentariu