Smnewstl.com 01-09-2021 (Dili) — Primeiru-Ministru (PM), Taur Matan Ruak, detetadu pozitivu bá Covid-19 iha semana kotuk, no oras ne’e dadauk kumpre hela auto-izolamentu iha nia rezidénsia Metiaut.
Ministru Prezidénsia Konsellu Ministru, Fidélis Manuel Leite Magalhães konfirma, Xefe Governu, Taur Matan Ruak aujensia iha reuniaun konsellu ministru, tanba PM Taur Infetadu bá Covid-19.
“Ita-nia Primeiru-Ministru aujente dala ida tan, tanba señór Primeiru-Ministru moras, maibé iha ona rekoperasaun ne’ebé di’ak, iha teste ne’ebé mak halo, señór Primeiru-Ministru pozitivu ho Covid-19, maibé momentu ida-ne’e, Primeiru-Ministru halo hela auto-izolamentu no tuir hotu rekomendasoens ne’ebé mak pessoál saúde hato’o no husu para halo tuir karik hakarak hetan saúde ne’ebé di’ak fila-fali,” dehan Ministru Fidélis Magalhães, iha Ministériu Finansas, kuarta ohin.
Fidélis Magalhães afirma, ho grasa Maromak nian, Xefe Governu nian saúde komesa rekopera, tanba hetan protesaun husi vasinasaun kompleta dalarua.
“Ho ida-ne’e ita bele dehan katak, rekoperasaun la’o di’ak, grasas mós Maromak nian, tanba iha ona protesaun ne’ebé mak ita-nia Primeiru-Ministru hetan husi vasinasaun kompleta, entaun sintomas sira-ne’e la’ós iha moras, maibé la’ós preukupasaun boot liu relasiona ho saúde señór Primeiru-Ministru nian,” dehan nia.
Nia hatutan, la importante atu públiku hakarak hatene kona-ba, PM Taur detetadu pozitivu bá Covid-19 iha sá loron, maibé importante komprova pozitivu bá Covid-19, nune’e bele halo tuir nafatin regra saúde nian.
“Ha’u hanoin asuntu ida-ne’e ladún importante, importante liu mak iha komprovativu katak, iha teste PM bainhira sente katak, iha moras halo tuir hotu rekizitus hirak ne’ebé mak saúde nian impoin,” hatete Fidélis.
Kona-ba posibilidade, Xefe Governu, Taur Matan Ruak mós sei la partisipa iha abertura bá Komisaun Revizaun Orsamentu Polítika (KROP) bá Orsamentu Jerál Estadu (OJE) tinan fiskál 2022.
Porta-voz governu ne’e dehan, sei halo diskusaun ho Primeiru-Ministru, Taur Matan Ruak, karik bele simu orientasaun ruma husi Xefe Governu rasik.
Entretantu, Primeiru-Ministru, Taur Matan Ruak, la partisipa iha reuniaun konsellu ministru, hahú iha Kuarta-Feira semana kotuk, no mós Kuarta-Feira ohin, tanba detetadu pozitivu bá Covid-19.
Nune’e enkontru konsellu ministru kuarta ohin, lidera husi Vise Primeiru-Ministru, José Maria dos Reis, no semana kotuk, lidera husi Vise Primeira-Ministra, Armanda Berta dos Santos.(ant)
Komentariu