Governu Aprova Subsídiu Bá Sidadaun Vítima Husi Vasina Kontra Kovid, Sei Simu USD 1000-10.000

Smnewstl.com Media Online  — Governu aprova ona projetu dekretu-lei ne’ebé aprezenta husi Ministru Finansas, Rui Gomes, kona-ba kriasaun apoiu finanseiru bá kazu no inkapasidade ne’ebé akontese rezulta husi vasina kontra Covid-19 ne’ebé sona bá ema.

Ministru Prezidénsia Konsellu Ministru, Fidélis Magalhães hateten, governu halo ona reaprovasaun bá proposta kriasaun apoiu finanseiru bá ema hirak ne’ebé sofre husi vasina kontra Covid-19.

Fidélis haktuir, proposta ne’e antes ne’e hetan ona aprovasaun husi konsellu ministru, maibé la konsege, tanba presiza halo alterasaun bá redasaun finál balun.

“Husi finansas reaprezenta proposta ida bá kriasaun apoiu finanseiru bá eventualidade de morte (mate) ou inkapasidade rezulta husi vasina. Ninia detallas atribuisaun bá ema hirak ne’ebé merese kualifikadu duni atu hetan ne’e sei nafatin de’it, laiha mudansa,” dehan Ministru Fidélis Magalhães, kuarta (21/07/21) hafoin remata enkontru konsellu ministru iha Palásiu Governu.

Konsellu ministru halo reapresiasaun bá proposta hirak ne’ebé antes ne’e aprova tiha ona, maibé, kontéudu proposta alterasaun refere laiha mudansa signikante.

“Assuntu ida-ne’e iha fulan hirak liu bá aprovadu tiha ona, maibé ministru proponente finansas hafoin katak, presiza atu hadi’a parte preámbulu nian no nia artigu balun hodi halo forte liután proposta refere, mak ohin konsellu aprova fila-fali antes haruka bá exelénsia Prezidente Repúblika,” subliña nia.

Tanba ne’e, governu sei haruka dekretu-lei ne’e bá Prezidente Repúblika, atu halo promulgasaun, bainhira promulga ona hafoin bele halo pagamentu.

Dekretu-lei ne’e define katak, iha kazu inkapasidade ki’ik liu 30% ne’ebé provoka husi vasina kontra Covid-19, sei simu kompensasaun ida ho valór dólar $ 1000 (amerikanu rihun ida).

Maibé, bá sira-ne’ebé inkapasidade iha entre 30% no 70% sei simu valór dólar amerikanu $ 2100, no iha kazu vasina provoka inkapasidade boot liu 70% sei simu dólar amerikanu $ 10.000 (rihun sanulu).

Alem de ne’e, verifikasaun bá mate ka inkapasidade no ninia relasaun ho vasina kontra Covid-19, sei hala’o tuir avaliasaun médika no Ministériu Saúde mak responsabiliza bá rekoñesimentu direitu apoiu nian.(ant)