SMnewstl.com 07 Maio 2026 -Durante Enkontru entre Ministériu Administrasaun Estadu (MAE) no Autoridade Regiaun Administrativa Espesiál Oe-Cusse Ambeno (RAEOA) nian foku ba hametin kordenasaun servisu no definisaun prioridade dezenvolvimentu iha area edukasaun, saúde, infraestrutura no agrikultura.
Iha reuniaun ne’e Ministro MAE Tomas do Rosário Cabral, fó orientasaun importante kona-ba preparasaun proposta orsamentu retifikativu, ho atensaun espesiál ba komponente salariu, bens no servisu, kapital dezenvolvimentu, no funsionamentu programa sira hanesan Fundo Espesiál Dezenvolvimentu (FED).
Aleinde ne’e, diskusaun mós inklui esforsu atu asegura implementasaun projetu sira ne’ebé finansia husi PNDS, inklui kontrolu ba programa merenda eskolar no planu asaun anual iha nivel teritoriu.
MAE rekomenda atu RAEOA tau prioridade ba setór estratéjiku sira hanesan edukasaun, saúde, obras públikas no agrikultura hodi promove dezenvolvimentu sustentavel.
Iha parte seluk ,Presidente RAEOA, Régio da Cruz Salu, husu mós asisténsia teknika kontinua husi MAE atu garante implementasaun programa sira la’o tuir regra no dalan legal, hodi asegura efisiénsia no transparénsia iha servisu públiku. Enkontru ne’e reforsa komitmentu governu central no autoridade lokal hodi hametin kolaborasaun ba dezenvolvimentu iha RAEOA. (/SMnews)
Komentariu