Smnewstl.com. | Manila,12 Novembru 2026-Governu Filipina prepara Sentru Mídia Internasionál ho fasilidade modernu no kompletu, inklui estúdiu televizaun, podcast, sala briefing, programa gastronomia no servisu bem-estar, atu garante konfortu ba jornalista lokál no internasionál besik 2.000 ne’ebé sei halo kobertura ba Simeira ASEAN dala 49.
Diretora Jerál Operasaun Mídia Simeira ASEAN 2026, Hazel Abad, aprezenta fasilidade hirak ne’e iha Sentru Mídia Internasionál, World Trade Center, Manila, Filipina, iha kinta-feira (12/11/2026), durante vizita delegasaun jornalista sira ne’ebé sei halo kobertura ba enkontru rejionál ne’e.
Abad esplika katak sentru mídia ne’e fahe ba sala prinsipál haat, mak Sala A, B, C no D, inklui sala briefing ho kapasidade ki’ik no médiu, atu fasilita atividade jornalista sira durante períodu simeira.
“Ami iha jornalista rejistadu besik 2.000 ne’ebé sei uza fasilidade iha Sentru Mídia Internasionál ne’e, no ami garante katak fasilidade hirak ne’e bele simu jornalista sira durante atividade Simeira ASEAN,” Hazel Abad esplika.
Konfortu Jornalista Sai Prioridade iha Preparasaun
Aleinde fasilidade profisionál, organizadór sira mós tau atensaun ba kondisaun no konfortu jornalista sira, liuhusi programa bem-estar, inklui servisu masajen, atu ajuda hamenus estres no fó oportunidade ba jornalista sira atu deskansa entre atividade kobertura.
Abad hateten katak,organizadór sira komprende difikuldade jornalista sira ne’ebé dala barak la iha tempu atu sai husi sentru mídia tanba servisu kobertura ne’ebé intensa.
Tanba ne’e, Filipina prepara servisu ospitalidade iha fatin hanesan, atu jornalista sira bele aproveita servisu hirak ne’e sem presiza lakon tempu ba viajen.
Organizadór sira mós prepara vizita turístika badak ba fatin interese sira iha Manila no área seluk, atu fó oportunidade ba jornalista internasionál sira atu koñese kultura no esperiénsia lokál Filipina.
Promove Kultura no Produtu Lokál Filipina.
Iha área gastronomia, Departamentu Turizmu Filipina prepara aprezentasaun kafé lokál, atu jornalista sira bele koko no koñese produtu kafé nasionál.
“Ami hakarak promove kafé lokál Filipina no fahe esperiénsia ne’e ho jornalista sira, inklui maluk Timor-Leste ne’ebé mós iha kafé di’ak,” Abad hatutan.
Sentru mídia ne’e mós iha espasu Pinoy Kalye, hanesan réplica ki’ik husi área istórika Intramuros, ne’ebé oferese ambiente tradisionál Filipina, inklui hahán no produtu lokál ne’ebé normalmente fa’an iha dalan.
Iha Sala D, organizadór sira disponibiliza loja produtu lokál liuhusi programa One Town, One Product, ne’ebé oferese lembransa no souvenir husi rejiaun oioin iha Filipina.
“Ami lori produtu lokál sira mai iha sentru mídia, atu jornalista sira bele sosa lembransa iha fatin ida de’it,” nia dehan.
Atu fasilita transasaun, sentru mídia ne’e mós disponibiliza servisu troka osan estranjeiru no pagamentu liuhusi kartaun kréditu.
Programa gastronomia ne’e inklui mós aprezentasaun hahán tradisionál husi illa prinsipál tolu Filipina, mak Luzon, Visayas no Mindanao.
Jornalista sira sei hetan oportunidade atu koko hahán karakterístiku husi rejiaun hirak ne’e, inklui liuhusi programa Slow Food, ne’ebé permite sira observa diretamente prosesu preparasaun hahán tradisionál Filipina, inklui piaya.
Fasilidade Teknolójika Apoia Kobertura Mídia
Iha aspetu profisionál, Sentru Mídia Internasionál disponibiliza estúdiu podcast, sala mídia prinsipál, espasu espesífiku ba reportagem direta (stand-up reporting) no ekipamentu televizaun ho teknolojia kompleta.
Iha Sala A, organizadór sira prepara estúdiu televizaun ho ekipamentu kámara no iluminasaun, inklui fasilidade ba xefe Estadu sira ne’ebé hakarak fó entrevista direta.
Sentru ne’e mós iha sentru kontrolu prinsipál atu simu sinal transmisaun direta husi sala reuniaun simeira nian, no kabina servisu independente ba jornalista sira.
Fasilidade hirak ne’e destina atu apoia jornalista mídia komersiál no lokál iha prosesu entrevista, produsaun kontéudu no transmisaun direta durante atividade simeira.
Iha parte partisipasaun, jornalista Timor-Leste na’in neen, hamutuk ho reprezentante mídia governamentál no privadu, partisipa iha vizita ne’e atu haree diretamente preparasaun no fasilidade sira ne’ebé organizadór Filipina disponibiliza.
Sentru Mídia Internasionál ne’ebé lokaliza iha World Trade Center, Manila, prepara ona atu simu jornalista sira rejistadu ba kobertura Simeira ASEAN dala 49.
Preparasaun ne’e hatudu esforsu Filipina atu asegura ambiente servisu ne’ebé modernu, konfortável no suporta nesesidade profisionál jornalista lokál no internasionál durante enkontru rejionál ne’e.
Komentariu