Smnewstl.com, Dili 11 Novembro 2026-Delegasaun mídia Timor-Leste ho membru na’in-10 viajem ba Manila, Filipina, atu akompaña atividade Simeira ASEAN ba dala 49 no observa diretamente preparasaun Media Center, hanesan parte ida husi esforsu atu prepara Timor-Leste ba responsabilidade hala’o Prezidénsia ASEAN iha tinan 2029.
Antes delegasaun ne’e sai ba Filipina, Sekretáriu Estadu Komunikasaun Sosiál (SEKOMS), Expedito Dias Ximenes, hala’o serimónia despedida ba delegasaun iha kuarta-feira, 11 Novembru 2026.
Delegasaun ne’e inklui jornalista na’in-6 husi órgaun komunikasaun sira, hanesan RTTL-EP, GMN-TV, SMNews, STL, TATOLI, I.P. no Timor Post, hamutuk ho reprezentante instituisaun relevante sira.
Durante vizita ne’e, jornalista sira sei iha oportunidade atu akompaña no relata atividade importante sira iha Simeira ASEAN ba dala 49. Enkuantu reprezentante mídia no instituisaun sira sei observa preparasaun no jestaun Media Center, inklui aspetu tékniku no organizasaun ne’ebé importante ba kobertura eventu internasionál.
Enkontu tékniku no atividade preparatóriu sira sei hala’o husi 12 to’o 14 Novembru 2026. Vizita ne’e konsidera nu’udar oportunidade atu delegasaun Timor-Leste aprende diretamente kona-ba sistema servisu mídia, fasilidade, koordenasaun no mekanizmu apoiu ba jornalista sira durante eventu ASEAN.
Sekretáriu Estadu SEKOMS, Expedito Dias Ximenes, hateten katak partisipasaun delegasaun ne’e iha objetivu atu aumenta koñesimentu no esperiénsia profisionál ba jornalista no reprezentante mídia Timor-Leste, liuliu kona-ba preparasaun no jestaun kobertura mídia iha eventu ASEAN.
Nia mós esplika katak limitasaun orsamentál sai nu’udar dezafiu ida ne’ebé limita númeru jornalista ne’ebé bele partisipa iha vizita ne’e. Maski nune’e, oportunidade ne’e sei fó benefísiu ba delegasaun atu aprende no komprende padraun servisu mídia iha nivel rejionál.
Vizita ne’e iha importánsia estratéjika ba Timor-Leste, tanba esperiénsia ne’ebé hetan iha Filipina bele sai referénsia atu prepara infraestrutura, rekursu umanu no sistema komunikasaun ba Prezidénsia ASEAN 2029.
Além ne’e, esperiénsia ne’e mós bele ajuda instituisaun komunikasaun sosiál no órgaun mídia sira atu hametin koordenasaun, aumenta kapasidade profisionál no asegura kobertura informasaun ne’ebé di’ak, efetivu no tuir padraun internasionál.
Timor-Leste kontinua prepara an atu asume responsabilidade rejionál ne’e, enkuantu Singapura sei simu Prezidénsia ASEAN iha tinan 2027. Preparasaun ba 2029 presiza kolaborasaun entre governu, instituisaun no mídia sira, atu asegura katak eventu importante ne’e bele hala’o ho susesu.
Komentariu