Smnewstl.com Dili 10 Novembru 2026-Ministra Edukasaun, Dulce de Jesus Soares, destaka inovasaun konstrusaun sala aula foun hamutuk sia iha Eskola 12 de Outubro, Tasi Tolu, Dili, ne’ebé utiliza teknolojia moderna ho materiál plástiku recicladu. Projetu ne’e implementa ho objetivu atu hadi’a infraestrutura eskolar no kria ambiente aprendizajen ne’ebé di’ak ba estudante sira.
Ministra Edukasaun esplika katak, konstrusaun sala aula foun ne’e realiza liuhusi kolaborasaun entre Ministériu Edukasaun, Gabinete Embaixadora Boa Vontade no parseiru sira husi Singapura, inklui organizasaun TIPS ASEAN no Classroom Group.
Governante ne’e hateten katak, teknolojia ne’ebé utiliza iha projetu ne’e transforma plástiku recicladu sai bloku konstrusaun, hodi permite prosesu harii edifísiu eskolar hala’o ho lalais no efisiénsia. Ho métodu ne’e, sala aula foun hamutuk sia iha Eskola 12 de Outubro konsege konstrui no remata iha períodu fulan ida de’it.
“Liuhusi teknolojia ne’e, ita transforma plástiku recicladu sai bloku konstrusaun, nune’e prosesu harii edifísiu eskolar bele la’o lalais no efisiente. Eskola 12 de Outubro konsege harii sala aula foun hamutuk sia iha períodu fulan ida de’it,” esplika Ministra Edukasaun.
Aleinde edifísiu sala aula, projetu ne’e mós inklui utilizasaun meza no kadeira ne’ebé produz husi materiál recicladu, ho kontribuisaun husi kompania Kalteks. Iha sala aula tolu utiliza meza no kadeira husi kompania ne’e, enkuantu sala aula seluk uza ekipamentu ne’ebé fornese husi Ministériu Edukasaun.
Ministra Dulce de Jesus Soares mós hato’o agradese ba parseiru sira no Fundasaun Mahon ne’ebé envolve-an iha konstrusaun ne’e, inklui kontribuisaun ba transferénsia koñesimentu tékniku ba engenheiru timoroan sira, atu aumenta kapasidade nasionál iha área konstrusaun.
“Projetu ne’e la’ós de’it atu harii infraestrutura eskolar, maibé mós atu hametin koñesimentu no kapasidade téknika ba engenheiru timoroan sira liuhusi transferénsia teknolojia no esperiénsia husi parseiru internasionál,” hateten Ministra.
Ho rezultadu konstrusaun ne’e, Primeiru-Ministru Kay Rala Xanana Gusmão fó ona orientasaun ba Ministériu Edukasaun atu identifika eskola sira iha área remota ne’ebé presiza sala aula foun ho urjénsia, hodi konsidera teknolojia moderna no materiál recicladu hanesan solusaun alternativa ba konstrusaun infraestrutura edukasaun.
Inovasaun konstrusaun ne’e espera bele kontribui ba hadi’a infraestrutura eskolar, promove reutilizasaun materiál recicladu no kria ambiente aprendizajen ne’ebé seguru, komfortável no apropriadu, hodi apoia estudante sira atu aprende, aumenta koñesimentu no dezenvolve sira-nia kapasidade akadémika.
Komentariu