SMnewstl.com KOREA-Seúl, 6 Novembru 2026 – Ministru Komérsiu no Indústria Timor-Leste, Filipus Nino Pereira, hala’o enkontru bilaterál ho Ministru Propriedade Inteletuál Repúblika Korea, Dr. Kim Yong Sun, iha Seúl, Repúblika Korea, hodi hametin relasaun no kooperasaun entre nasaun rua, liuliu iha área propriedade inteletuál.
Enkontru bilaterál ne’e sai oportunidade importante ba Ministériu Komérsiu no Indústria Timor-Leste no Ministériu Propriedade Inteletuál Repúblika Korea atu troka hanoin no diskute kona-ba implementasaun Memorandu Entendimentu (MoU) kona-ba Kooperasaun Propriedade Inteletuál, ne’ebé ministériu rua asina ona iha kontestu vizita ofisiál Prezidente Repúblika Timor-Leste ba Repúblika Korea.
Iha intervensaun, Ministru Filipus Nino Pereira hato’o agradeseimentu ba Ministru Kim Yong Sun no delegasaun MOIP tanba simu ho di’ak delegasaun Timor-Leste no fasilita enkontru bilaterál ne’e. Nia mós hato’o apresiasaun ba Governu no povu Repúblika Korea tanba ospitalidade ne’ebé fó ba delegasaun Timor-Leste.
Ministru Filipus Nino Pereira konsidera asinatura Memorandu Entendimentu (MoU) ne’e nu’udar marku importante ida ba hametin relasaun bilaterál entre Timor-Leste no Repúblika Korea, liuhusi kompromisu komún atu aprofunda kooperasaun institusionál iha área propriedade inteletuál.
Ministro Nino afirma katak,parseria ida-ne’e iha importánsia boot ba Timor-Leste, liuliu iha esforsu atu hametin kapasidade institusionál nasionál no avansa prioridade dezenvolvimentu nasaun.
“Repúblika Korea nia susesu iha dezenvolvimentu sistema propriedade inteletuál modernu no ne’ebé hetan rekoñesimentu internasionál, sei sai oportunidade valioza ida ba troka esperiénsia no aprendizajen mútuu entre ita-nia nasaun rua,” Ministru Filipus Nino Pereira dehan.
Governante ne’e mós hato’o esperansa katak,kooperasaun entre ministériu rua sei kontinua dezenvolve liuhusi komprensaun mútuu, troka koñesimentu, dezenvolvimentu kapasidade no hametin relasaun institusionál.
Tuir Ministru Filipus, parseria ne’e presiza harii ho vizaun longu prazu, atu asegura katak kooperasaun ne’ebé hala’o bele fó benefísiu ba parte rua no responde ba prioridade dezenvolvimentu husi nasaun ida-idak.
Iha oportunidade ne’e, Ministro reafirma kompromisu Ministériu Komérsiu no Indústria Timor-Leste atu kontinua servisu hamutuk ho Ministériu Propriedade Inteletuál Repúblika Korea, bazeia ba espíritu amizade, konfiansa mútuu no kompromisu komún.
Enkontru bilaterál ne’e espera atu sai pasu importante ida ba implementasaun MoU no dezenvolve kooperasaun prátika entre Timor-Leste no Repúblika Korea iha área propriedade inteletuál.
Komentariu