Smnewstl.com Dili 09 Novembro 2026-TradeInvest, ho apoiu husi União Europeia (UE), liuhusi International Trade Centre (ITC), organiza formasaun téknika kona-ba aspetu legál sira iha tratadu investimentu internasionál. Formasaun ne’e iha objetivu atu hametin koñesimentu no kapasidade téknika funsionáriu sira, hodi prepara Timor-Leste atu atrai investidór internasionál no kumpre kompromisu sira iha área investimentu.
Diretór Ezekutivu TradeInvest, Duilio Marino Gusmão Araújo da Silva, hato’o agradese ba União Europeia no International Trade Centre (ITC) tanba apoiu tékniku ne’ebé sira fó, liuliu disponibilizasaun peritu internasionál, Professor Seth Van Doorn, atu fahe koñesimentu kona-ba aspetu legál iha tratadu investimentu internasionál.
Duilio Marino afirma katak, formasaun ne’e iha importánsia estratéjika ba TradeInvest, tanba instituisaun ne’e iha responsabilidade atu promove investimentu no esportasaun, fasilita prosesu investimentu, no apoia negosiasaun akordu investimentu entre Estadu no investidór sira.
“TradeInvest presiza iha koñesimentu kle’an kona-ba obrigasaun internasionál sira ne’ebé Timor-Leste asume, atu asegura katak akordu no polítika investimentu ne’ebé dezenvolve kumpre ho enquadramentu legál internasionál,” Duilio Marino dehan.
Nia esplika tan katak, formasaun ne’e la’ós de’it atu hasa’e kapasidade téknika funsionáriu TradeInvest nian, maibé mós atu fahe koñesimentu ne’ebé hetan ba instituisaun relevante sira seluk, ne’ebé iha responsabilidade iha área ekonomia, komérsiu no investimentu.
Iha parte seluk, Professor Seth Van Doorn, ne’ebé reprezenta Projetu União Europeia iha Timor-Leste, afirma katak prosesu integrasaun Timor-Leste ba Organizasaun Mundiál Komérsiu (OMC/WTO) no adezaun ba ASEAN la’ós de’it kona-ba sai membru iha organizasaun rejionál no internasionál sira, maibé mós kona-ba implementasaun reforma ekonómika atu promove dezenvolvimentu nasionál.
“Integrasaun ba ASEAN no OMC la’ós de’it kona-ba sai membru organizasaun internasionál, maibé mós kona-ba implementasaun reforma ekonómika ambisioza ne’ebé bele transforma ekonomia Timor-Leste no harii baze forte ba futuru nasaun,” Seth Van Doorn afirma.
Nia subliña katak, reforma ekonómika ne’e importante atu aumenta partisipasaun Timor-Leste iha komérsiu no investimentu internasionál, inklui promove esportasaun produtu nasionál ba merkadu globál, hadi’a sistema regulamentasaun ba bens no servisu ne’ebé tama ba Timor-Leste, no dezenvolve enquadramentu legál ne’ebé bele atrai investidór estranjeiru.
Maski nune’e, reforma sira ne’e tenke kontinua asegura protesaun ba interese Estadu no povu Timor-Leste, atu investimentu internasionál bele lori benefísiu ba dezenvolvimentu ekonómiku nasionál.
Liu husi formasaun téknika ne’e, TradeInvest no União Europeia espera katak instituisaun nasionál sira sei iha kapasidade forte liután atu kumpre kompromisu internasionál, hadi’a ambiente investimentu no aproveita oportunidade ekonómika ne’ebé mosu iha prosesu integrasaun Timor-Leste ba ASEAN no merkadu globál.
Komentariu