SMnewstl.com |Dili, 6 Novembru 2026-Bainhira Timor-Leste hahú tama ba períodu preparasaun polítika ba Eleisaun Prezidensiál 2027, Primeiru-Ministru Kay Rala Xanana Gusmão hato’o deklarasaun kona-ba lideransa feto iha nivel aas liu Estadu, hodi afirma katak pessoalmente sei apoia kandidatu feto ida ba kargu Prezidente Repúblika.
“Permite mai ha’u pessoalmente deklara, ha’u sei apoia feto ba Prezidente Repúblika,” deklara PM Xanana iha ninia diskursu durante Komemorasaun Loron Nasionál Feto Timor-Leste ba dala 50 iha Centro Convenção Dili Sesta ne’e.
Deklarasaun ida-ne’e hato’o iha momentu ne’ebé nasaun fó omenajen ba feto eroína sira ne’ebé sakrifika sira-nia moris durante luta libertasaun nasionál.
PM Xanana subliña katak independénsia Timor-Leste la hetan husi sakrifísiu mane sira de’it, maibé mós husi korajen, kontribuisaun no sakrifísiu feto Timoroan sira.
Durante luta rezisténsia, feto sira iha frente armada, klandestina no diplomátika hamutuk ho mane sira enfrenta okupasaun, violénsia no prizaun. Sira organiza komunidade, lori informasaun no fó apoiu ba kombatente sira, hodi mantein espíritu luta ba liberdade no ukun-rasik-an.
Tuir PM Xanana, kontribuisaun feto sira iha istória libertasaun nasionál tenke hetan rekoñesimentu no rejistu adekuadu, tanba independénsia ne’ebé nasaun goza ohin loron mak rezultadu husi sakrifísiu povu tomak, feto no mane.
Iha kontestu lideransa polítika, deklarasaun PM Xanana kona-ba apoiu ba kandidatu feto ba Prezidente Repúblika lori atensaun ba partisipasaun feto iha prosesu demokrátiku no oportunidade atu asume responsabilidade aas iha estrutura Estadu.
Maski feto Timoroan sira ohin loron ona kontribui iha Governu, Parlamentu Nasionál, tribunál, diplomásia, edukasaun, saúde no setór privadu, partisipasaun feto iha pozisaun lideransa aas nafatin sai asuntu importante iha debate kona-ba igualdade jéneru.
PM Xanana mós enkoraja joven feto sira atu investe iha edukasaun, dezenvolve koñesimentu no fiar ba sira-nia kapasidade, atu iha futuru bele sai lider, inovadora no protagonista iha dezenvolvimentu nasionál.
Ho Eleisaun Prezidensiál 2027 besik mai, deklarasaun ne’e hatudu apoiu pesoál ne’ebé PM Xanana hato’o ba ideia lideransa feto iha kargu Prezidente Repúblika. Maibé kandidatura, prosesu eleisaun no desizaun ikus sei depende ba mekanizmu demokrátiku no vontade povu liuhusi votu.
Komentariu