Smnewstl.com – SEÚL, KOREIA DO SUL, 06 Novembru 2026 – Prezidente Repúblika Korea do Sul, Lee Jae-myung, iha sexta-feira (06/11), simu Prezidente Repúblika Demokrátika Timor-Leste, José Ramos-Horta, iha Seúl, Korea do Sul, atu hala’o enkontru bilateral ho objetivu atu haforsa tan relasaun amizade, parseria no kooperasaun entre nasaun rua.
Vizita ofisiál Prezidente José Ramos-Horta nian ne’e hala’o tuir konvite husi Prezidente Lee Jae-myung, nu’udar oportunidade importante atu hametin relasaun diplomátika no loke oportunidade foun ba kooperasaun bilateral entre Timor-Leste no Repúblika Korea.
Iha ninia intervensaun, Prezidente Lee Jae-myung konsidera katak enkontru bilateral ne’e sei sai oportunidade importante atu reafirma fali relasaun istórika no ligasaun espesiál ne’ebé durante tempu naruk liga ona nasaun rua, no mós atu loke kapítulu foun ida iha relasaun bilaterál entre Timor-Leste no Repúblika Korea.
Prezidenti Lee mós hato’o boas-vindas ba Prezidente José Ramos-Horta, no agradese ba ninia prezensa no vizita ofisiál ne’e.
Iha parte seluk, Prezidente José Ramos-Horta hato’o apresiasaun ba amizade metin no istórika ne’ebé liga Timor-Leste ho Repúblika Korea, no subliña katak importante tebes atu nasaun rua kontinua buka dalan hodi aprofunda parseria no kooperasaun, liuliu iha área empregu, teknolojia, investimentu no dezenvolvimentu públiku.
Prezidenti Ramos-Horta mós manifesta ninia kontentamentu kona-ba oportunidade kooperasaun ne’ebé bele dezenvolve hamutuk, liuliu iha períodu foun Timor-Leste nian hanesan membru ASEAN ba dala 11. Nia konsidera katak pozisaun foun ne’e sei loke dalan ba oportunidade parseria no kooperasaun ne’ebé luan liután entre Timor-Leste no Repúblika Korea.
Iha ninia intervensaun, Xefe Estadu Timor-Leste nian mós hato’o agradese ba kontribuisaun importante ne’ebé Repúblika Korea halo durante tempu naruk ba prosesu dezenvolvimentu nasionál Timor-Leste.
Kontribuisaun ne’e hahú husi apoiu ne’ebé forsa manutensaun dame Koreana sira fó durante períodu tranzisaun ba independénsia Timor-Leste, no kontinua liuhusi servisu parseiru dezenvolvimentu Koreanu sira, voluntáriu no instituisaun oioin.
Nia mós afirma katak esperiénsia estraordinária Repúblika Koreia nian iha prosesu rekonstrusaun nasionál no transformasaun ekonómika sai hanesan lisaun valiozu ba Timor-Leste, iha esforsu atu promove dezenvolvimentu nasionál no harii futuru ne’ebé sustentável.
Aleinde ne’e, Prezidente Ramos-Horta hato’o apresiasaun ba partisipasaun no envolvimentu ativu husi instituisaun akadémika, reprezentante sosiedade sivíl no individuál sira ne’ebé kontribui ba manutensaun dame no kooperasaun internasionál.
Ramos Horta mos subliña katak,relasaun entre Timor-Leste no Repúblika Korea la limita de’it ba relasaun diplomátika entre governu rua, maibé iha baze metin iha amizade metin, solidariedade no ligasaun direta entre povu Timor-Leste no povu Korea.
Iha área kooperasaun ba futuru, Prezidente José Ramos-Horta konsidera katak nasaun rua iha potensiál boot atu aprofunda tan relasaun bilaterál, no hein katak diskusaun ne’ebé hala’o iha enkontru ne’e bele transforma sai rezultadu konkretu no prátiku.
Área kooperasaun ne’ebé identifika inklui dezenvolvimentu kapasidade no abilidade juventude sira-nian, hametin oportunidade empregu, promove investimentu estranjeiru, no aproveita esperiénsia Repúblika Korea nian iha siénsia, teknolojia no inovasaun.
Prezidente Ramos-Horta manifesta konfiansa katak, ho esforsu no kompromisu hamutuk, relasaun entre Timor-Leste no Repúblika Korea sei kontinua dezenvolve no sai forte liután iha futuru.
Iha parte ikus, Xefe Estadu Timor-Leste nian repete ninia agradese ba akollimentu ne’ebé Prezidente Lee Jae-myung fó, amizade no apoiu kontinua ne’ebé Repúblika Korea hatudu ba Timor-Leste durante tempu naruk.
Xefe estadu nee mós hato’o parabéns ba Prezidente Lee Jae-myung tanba hetan mandatu Prezidente liuhusi eleisaun iha tinan kotuk, no konsidera katak vitória ne’e lori esperansa no inspirasaun ba nasaun hotu, liuliu ba nasaun rua ne’ebé iha esperiénsia hamutuk iha esforsu atu preserva demokrasia, hametin Estadu Direitu no promove estabilidade no dezenvolvimentu nasionál.
Enkontru bilateral ne’e reprezenta etapa importante ida atu hametin amizade istórika no haforsa tan relasaun diplomátika, ekonómika no kooperasaun entre Timor-Leste no Repúblika Korea, iha kontestu Timor-Leste nia integrasaun foun nu’udar membru ASEAN.
Komentariu