Smnewstl.com | Dili, 11 Agostu 2026 — Servisu Migrasaun ,Husi Ministériu Interior detekta no asegura sidadaun estranjeiru feto nain lima iha fatin karaoke ida iha area Hudi Laran Dili,tanba suspeita uza vistu turista atu hala’o atividade komersial.
Iha Operasaun ne’ebe hala’o hosi Ekipa Servisu Operasaun Migrasaun nu’udar parte hosi atividade fiskalizasaun no inspesaun ba sidadaun estranjeiru sira iha hotelaria no fatin karaoke iha Kapital Dili no konsege asegura sidadaun estranjeiru feto nain lima ho inisial LRA, ISA, PO, DH no ARP.
Bazeia ba verifikasaun pasaporte no Sistema Jestaun Fronteira, ekipa Migrasaun detekta katak vistu turista hosi sidadaun hirak ne’e mate ona.
Tuir rezultadu identifikasaun, sidadaun estranjeiru hirak ne’e suspeitu uza vistu turista atu buka servisu no hetan lukru iha Timor-Leste, ne’ebé konsidera nu’udar violasaun ba Lei Migrasaun no Asilu.
Servisu Migrasaun refere katak violasaun ne’e bele sujeita ba sansaun tuir Artigu 143, inklui pagamentu multa. Ba sidadaun estranjeiru ne’ebé rekuza kumpre prosedimentu ka sansaun, autoridade sei submete lista naran sira ba Ministériu Públiku atu prosesa tuir lei.
Servisu Migrasaun kontinua halo fiskalizasaun ba atividade sidadaun estranjeiru iha Timor-Leste, liuliu iha setor hotelaria no fatin hiburan, hodi asegura kumprimentu ba regulamentu migrasaun no kondisaun vistu.(Smnews)

Lee nain: 7
Lee Mós:
PM Taur Lansa Fatuk Dahuluk Bá Konstrusaun Sidade Universitáriu Aileu, PNTL Blokea Komunidade Afeitado