Smnewstl.com | Dili, 20 Abril 2026 – Komandu Jerál Polísia Nasional Timor-Leste (PNTL) halo movimentu boot iha estrutura lideransa, hafoin ofisias dirijentes ida no ofisias superior 12 simu pose ofisial husi Komandante Jerál, Komisariu Assistente Polísia Afonso dos Santos.
Serimonia tomada de pose ne’ebé hala’o iha Kaurtél Jerál Kaikoli marka etapa foun ba PNTL, ho objetivu atu reforça kontrolu seguransa no melhora koordenasaun servisu iha territóriu tomak.
Komisariu Assistente Agostinho Gomes fila fali hodi lidera Unidade Espesial Polísia (UEP), enkuantu Superintendente Xefe Polísia Joni Viana das Regras assume kargu Komandante PNTL Munisípiu Manatuto.
Mudansa lideransa mos akontese iha munisípiu estratéjiku sira:
- Viqueque agora lidera husi Euclides Belo
- Lautém lidera husi António Regu Fernandes
- Ainaro assume husi Emilio dos Santos
- Bobonaro lidera hikas husi Damião Correia
- Baucau assume husi João Sancho Pires
Iha nivel unidade no estrutura sentral, Calisto Gonzaga lidera hikas Unidade Patrullamentu Fronteira (UPF), no Nicolao F. da Costa assume Komandu RAEOA.
Enkuantu, Moises Amaral lidera Diresaun Justisa no Disiplina, no Inacio Saldanha torna Xefe Departamentu Seguransa iha Komandu Jerál.
Komandante Jerál PNTL subliña katak lideransa foun sira tenki kria relasaun metin ho autoridade lokal, igreja no komunidade, tanba ne’e mak chave atu garante estabilidade no seguransa iha nasaun.
“Ita presiza komandante sira ne’ebé besik ba povu, iha ligasaun diak ho lideransa lokal no bele kontrola diak membru sira iha terenu,” afirma Afonso dos Santos. (/SMnews)
Komentariu