Smnewstl.com || Viqueque, 04 Maiu 2026 – Ministru Agrikultura, Pekuária, Peskas no Floresta (MAPPF), Marcos “MAMETA” da Cruz, hamutuk ho autoridade Munisípiu Viqueque, ofisialmente lansa atividade kuda hare ho utilizasaun ekipamentu agríkola modernu iha Natar Wedare Badak, Suku Luca, Postu Administrativu Viqueque Vila.
Iha okasiun ne’e, Ministru Marcos da Cruz hateten katak prezensa Governu iha área ne’e atu fó apresiasaun no apoiu ba esforçu komunidade agrikultór sira ne’ebé hahú ona halo servisu iha natar.
“Ita haree rai iha natar Wedare ne’e abandona tinan barak ona, maibé iha potensia boot. Tanba ne’e, ita mai atu fó korajen no apoiu ba inisiativa di’ak husi komunidade ne’ebé komesa ona halo servisu,” dehan Ministru.
Nia hateten tan katak programa Governu nian liu-husi MAPPF sei kontinua servisu hamutuk ho povu atu hasa’e produsaun iha setór agrikultura, pekuária, peskas no florestas. Nia mós fó apresu ba xefe suku Luca ne’ebé lidera komunidade ho inisiativa atu organiza servisu iha natar.
Ministru esplika katak utilizasaun ekipamentu modernu sei fasilita servisu agrikultór sira, hodi redús tempu no kustu operasionál. Uluk, agrikultór sira presiza selu ema $5 ba kada servisu kuda hare no kolleta, maibé agora ho mákina modernu sira bele halo servisu rasik ho efisiénsia liu.
Iha parte seluk, Prezidente Autoridade Munisípiu Viqueque (PAM), Francisco C.S. de Gonzaga, hato’o agradesimentu ba MAPPF tanba apoiu ekipamentu modernu ne’ebé ajuda hamenus difikuldade agrikultór sira nian.
Nia husu ba komunidade atu kuidadu no halo manutensaun di’ak ba ekipamentu sira atu bele uza ba tempu naruk.
Koordenadór Natar Wedare Badak, Cosme Gomes Guterres, hateten katak mákina modernu sira ne’e tulun loos agrikultór sira. Nia hatete katak uluk sira uza de’it ekipamentu tradisionál hanesan ai-suak, insada no katana, maibé agora sei bele hasa’e produsaun liutan ho teknolojia foun. (/SMnews)
Komentariu