SMnewstl.com | Viqueque, 04 Maiu 2026 – Ministru husi Ministériu Agrikultura, Pekuária, Peskas no Florestas (MAPPF) hala’o observasaun direta ba sistema irigasaun iha Mota Wetutu, ne’ebé lokaliza iha Suku Bahalarawain, Postu Administrativu Viqueque Vila, Munisípiu Viqueque.
Durante vizita ne’e, Ministru hateten katak kada tinan governu sempre mobiliza eskavador atu normaliza kanal irigasaun hodi kanaliza bee ba natar sira iha área Bahalarawain. Maibé, iha tinan ida-ne’e mosu mudansa boot tanba mota halai dok husi
dalan kanalizasaun, ne’ebé afeta diretamente sistema irigasaun.
“Los duni, kada tinan ita presiza mobiliza eskavador atu normaliza kanal. Maibé ohin loron ita observa katak iha mudansa boot, mota halai dok fila-fali. Tanba ne’e, ami diskute hela atu mobiliza eskavador husi Uatulari mai atu normaliza fali kanal nee,” dehan Ministru.
Ministru mos subliña katak, liu husi solusaun temporáriu, governu sei tau mós atensaun ba konstrusaun irigasaun ne’ebé permanente. Nune’e, nia orienta ona ba Direção Nasional Irigasaun atu mobiliza ekipa enginieru sira, servisu hamutuk ho komunidade lokal hodi halo levantamentu no dezenhu tékniku, depois mak prepara orsamentu atu implementa projetu ne’e.
“Provizoriamente, ita presiza asegura katak hare sira la bele mate. Tanba ne’e, ita kontinua mobiliza eskavador atu normaliza kanal, hodi garante bee bele to’o ba natar no salva haree ne’ebé moris ona,” nia esplika tan.
Iha oportunidade ne’e, Ministru husu ba agrikultór sira atu kontinua servisu no hametin kooperasaun ho Ministériu, liu husi komunikasaun regular atu asegura sistema irigasaun bele funsiona di’ak.
Vizita ne’e akompaña husi Prezidenti Autoridade Munisípiu Viqueque, Komandante PNTL Munisípiu Viqueque, lideransa lokal no reprezentante komunidade sira seluk. (/SMnews)
Komentariu