Smnewstl.com | Dili, 29 Abril 2026 – Fundadór no Sekretáriu Jerál, Mari Alkatiri hamutuk ho estrutura partido no membru CCF presta omenajen ikus ba saudoso Camarada Mariano Fatubai Mota, ne’ebé komunmente konhese hanesan “Marito Mota”, iha nia rezidénsia Kuluhun.
Tuir publikasaun ne’ebe Smnsws asesu iha pagina offisial Marí Alkatiri, lideransa FRETILIN hatudu solidariedade no unidade, hodi aprezenta kondolénsia profunda ba família enlutada.
Marito Mota rekonhesidu hanesan figura ida ne’ebé dedika an tomak ba luta no servisu ba povu, ho kontribuisaun ne’ebé sei marka iha história politika Timor-Leste.
Iha tempu despedida ne’e, liafuan sira emosional sai husi lideransa no militante sira, ne’ebé hatete katak, maski isin la iha ona, maibé nia memória, nia luta no nia espírutu sei moris nafatin iha povu nia laran no jerasaun tuir mai.
“Adeus, kamarada… adeus ho respeitu boot no gratidaun. Ita boot nia memória sei hela nafatin iha ami hotu nia laran.”
Deskansa iha paz, Marito Mota. Memória sei la mate.
Marito Mota, fundadór grupu rezisténsia FITUN, eis Deputadu Parlamentu Nasional husi FRETILIN no ativista rezisténsia urbana ne’e, hakotu i’is, Tersa-feira, (28/04).
Marito Mota konhese hanesan jovem rezistente ne’ebé firme no laran metin, ne’ebé dedika nia moris tomak hasoru invasaun militar ho korajen la’o to’o rohan.
Matebian ne’e la’ós deit lakon ba família, maibé mos ba nasaun tomak. Espiritu nasionalizmu ne’ebé nia husik hela sei nafatin moris iha juventude Timor-Leste nia laran, hanesan naroman ida ne’ebé sei guia dalan ba futuru.
Komentariu