Smnewstl.com | Dili, 29 Abril 2026 – Gabinete Prezidente Repúblika fó sai deklarasaun ofisiál ho lian forte, hodi responde direta ba akuzasaun grave ne’ebé hato’o husi Deputada Nina Rangel, husi bankada FRETILIN.
Iha deklarasaun ne’ebe Smnews asesu, Prezidénsia reafirma katak demokrasia permite divergénsia, maibé alerta katak liberdade espresaun la bele uza atu ataka dignidade pesoál ka halo difamasaun.
Kontrovérsia ne’e hahu bainhira Deputada Rangel alega katak José Ramos-Horta fó pasaporte diplomátiku ba “máfia” no envolve iha prosedimentu ilegal.
Nia mós liga nomeasaun Lin Xiaofan (Frank Lin) hanesan Konselleiru Espesiál ba Prezidente, bazeia ba Dekretu Prezidensiál No. 64/2025.
Prezidénsia responde klaru: Akuzasaun sira ne’e “defamatóriu tebes” no la iha prova legál. To’o ohin loron:
Laiha desizaun tribunál
Laiha alerta INTERPOL
Laiha akuzasaun ofisiál husi autoridade judisiál
Fonte internasionál importante, inklui The Guardian no Organized Crime and Corruption Reporting Project, mós hateten katak laiha evidénsia ne’ebé liga Lin ho atividade kriminál ka grupu sira ne’ebé hetan sansaun.
Prezidente Ramos-Horta mós afirma klaru katak: “Señór Lin la halo sala ida iha Timor-Leste. Governu mak deside simu investimentu ka lae.”
Deklarasaun ne’e mós aviza katak alegasaun la ho prova bele estraga imajen Timor-Leste iha mundu nia matan, liu-liu bainhira nasaun buka atrai investidór internasionál.
Desafia ba Deputada:
Prezidénsia husu Deputada Rangel atu aprezenta evidénsia legál, tanba relatóriu investigativu la substitui desizaun tribunál.
Kazu Sei Ba Dalán Legál
Kestaun tomak sei trata husi Ministériu Públiku, no parte hotu sei hetan oportunidade atu prova sira-nia alegasaun.
Mensagem klaru husi Prezidénsia:
Demokrasia presiza debate – maibé debate tenke bazeia ba faktu, la’ós acusasaun sira ne’ebé bele hamate reputasaun ema. (/SMnews)
Komentariu