SMnewstl.com | Dili, 28 Abril 2026-Timor-Leste perde tan figura importante ida iha mundu jornalizmu. Jornalista senior, fundador Timor Post no eis Prezidente Konselho Imprensa, Otelio Ote, hakotu ona i’is dader ne’e iha Hospital Referal Oecusse tamba sofre moras komplikadu.
Mariano da Costa, eis jornalista Timor atual iha SMNews, haktuir katak nia konhese matebian desde hahu nia kareira iha mundu jornalizmu iha tinan 2004.
Iha tempu ne’ebá, Ote la’ós de’it hanesan jornalista, maibé mos editor no figura importante ida iha fundasaun jornalizmu independente iha Timor-Leste.
Otelio Ote konsidera hanesan jornalista veteranu ne’ebé hahú ona desde tempu okupasaun Indonesia, ho esperiénsia servisu iha RCTI, antes kontinua nia dedikasaun iha Timor Post iha tempu independénsia.
Tuir Mariano, Ote mak ema ida ne’ebé iha ideia kreativa barak no sempre hakarak fó inspirasaun ba jerasaun foun.
Nia la’o nafatin ho mensajen klaru ba jornalista foinsae sira atu adapta ho mudansa digital no kontinua haka’as an hodi halo diferensa iha profisaun.
“Imi tenki haka’as an, aproveita oportunidade sira ne’ebé iha no lori ba oin,” hanesan liafuan inspirativu ne’ebé Ote sempre hato’o ba ekipa SMNews bainhira nia sei lidera Konselho Imprensa.
Antes nia lakon, Ote no ekipa SMNews iha planu atu kontinua servisu hamutuk, inklui apoiu iha lideransa programa sira. Maibé planu refere la konsege realiza tanba nia hetan responsabilidade foun nudar Oecusse oan hanesan asesor media ba atual Prezidente Autoridade RAEOA, Régio Soares.
Maski nia isin hakotu ona, maibé nia memória, kontribuisaun no valor sira sei hela nafatin iha laran komunidade jornalizmu Timor-Leste, hodi inspira jerasaun ba jerasaun.
Adeus maun Ote. Ita boot nia servisu sei moris nafatin iha istória.
Força no coragem ba família iha tempu triste ida ne’e. (/SMnews)
Komentariu