Smnewstl.com | Covalima, 26 Abril 2026 Udan boot ne’ebé kontinua durante loron rua liubá halo estragus grave ba infraestrutura, liuliu estrada prinsipal iha Posto Administrativu Fohorem.
Tuir informasaun husi fonte lokal sira, dalan ligasaun husi Fohorem ba Suku Datórua no mós direksaun ba Posto Fatumea, liuliu área Fatululik, agora dadauk kotu total no la bele asesu.
Udan be’en rezulta rai halai kontribui maka’as ba danu ne’e, halo estrada balu monu no kotu hodi impede movimentu transporte publiku.
Komunidade lokal sira agora hasoru difikuldade boot atu halo mobilidade lorloron, inklui asesu ba merkadu, servisu saúde no edukasaun.
Autoridade lokal no ekipa tékniku sira sei halo avaliasaun iha terrenu hodi determina nivel estragus no buka solusaun lalais atu hadi’a fali ligasaun importante ne’e.
Enkuantu ne’e, sidadaun sira husu atu kuidadu no evita viajen ba área afetadu tanba risku sei aas.
Situação ne’e hatudu fali nesesidade atu hadia sistema drenajen no reziliénsia infraestrutura iha área sira ne’ebé vulneravel ba mudansa tempu ekstremu.(/SMnews)
Komentariu