SMnewstl.com | Díli, 24 Abril 2026 – Relasiona ho kazu omesídiu neglijente ne’ebé akontese iha área Delta Fomentu II iha tinan 2025, ne’ebé rezulta morte husi vítima Zizelma Maria Verdial, Tribunal Judicial de Primeira Instância de Díli, liuhosi juiz koletivu, deside ona atu kondena arguidu ho inisiál MSDC.
Tuir desizaun ne’e, kondénadu sei kumpri pena prizaun tinan 4 fulan 6, bazeia ba faktu sira ne’ebé prova tiha ona durante prosesu julgamentu.
Iha loron 23 Abril 2026, Polícia Nacional de Timor-Leste (PNTL), liuhosi Diresaun Servisu Investigasaun Kriminal (DSIK), ezekuta mandadu detensaun husi tribunal hodi detein kondénadu atu kumpri pena.
Operasaun detensaun realiza ho kordenasaun entre PNTL-DSIK no PNTL Munisípiu Manufahi, ne’ebé konsege lokaliza no detein kondénadu iha Aldeia Ailuli, Suku Letefoho, Postu Administrativu Same. Durante operasaun, kondénadu no nia família hatudu kooperasaun diak ho autoridade sira.
Hafoin detensaun, kondénadu lori ba Kuartel Jerál PNTL iha Caicoli atu halo prosesu identifikasaun no sertifikasaun, antes transfere ba Estabelecimentu Prizionál Bekora hodi kumpri pena tuir desizaun tribunal.
Kazu ida ne’e sai hanesan sinal katak sistema justisa kontinua hala’o no autoridade kompetente sira nafatin komprometidu atu asegura aplikasaun lei ho rigor no transparénsia.(/SMnews)
Komentariu