Smnewstl.com | DILI, 09 Abril 2026 – Sekretáriu-Jerál Partidu FRETILIN, Marí Alkatiri, deklara ba públiku katak membru Komité Sentral ne’ebé deside atu kandidata a’an ba Prezidente Repúblika ba períodu 2027–2031 nudar kandidatu independente, tenke hatama kartaun partidu nian.
Ba Smnews liu husi kontaktu mensajen WahtsApp hata’an ba deklarasaun ne’e, eis membru Comité Central atual militante FRETILIN, Rui Maria de Araújo, dehan katak nia lakohi atu tama iha polemika refere.
Nia hatete de’it katak públiku no parte interesada sira presiza hare fila fali ba Estatutu partidu atu interpreta ho klariedade.
Tuir Estatutu Partidu FRETILIN ne’ebe Smnews asesu liu-liu iha Artigu 14.º númeru 13, la hatudu proibisaun direta ba membru ka estrutura partidu atu kandidata ba funsaun Prezidente Repúblika.
Iha dispozisaun refere dehan katak: “Labele sai kandidatu ba funsaun saida deit husi partidu seluk ka organizasaun ne’ebé asosia ka depende ba sira, la iha autorizasaun eskrita hosi Komisaun Polítika Nasionál husi Komité Sentral.”
Tuir interpretasaun jurídiku no polítiku, regra ida ne’e foka de’it ba proibisaun membru atu reprezenta partidu seluk ka organizasaun afiliadu, la’ós atu limita kandidatura iha kuadru nasionál hanesan eleisaun Prezidensiál.
Tanba ne’e, membru ka estrutura FRETILIN bele de’it kandidata ba Prezidente Repúblika, desde ne’e la reprezenta partidu seluk, ka hetan autorizasaun ofisiál husi orgaun kompetente partidu nian wainhira nesesáriu.
Analista sira hateten katak eleisaun Prezidensiál iha Timor-Leste natureza ida ne’ebé individual no suprapartidáriu, ne’ebé la iha obrigasaun atu kandidatu sai nudar reprezentante partidu espesífiku.
Nune’e, Artigu 14.º númeru 13 konsidera hanesan mekanizmu disiplina interna atu prevene konflitu lealdade polítika, la’ós atu taka dalan ba aspirasaun polítika membru sira iha nivel nasionál(/SMnews)
Komentariu