Timor Oan Iha Shanghai Reprezenta TL Partisipa Festival Kultura Iha Universidade Fudan

Smnewstl.com (China) – Estudantes Timor oan nain 6 ne’ebe halao hela estudo iha Shanghai-China reprezenta Timor-Leste partisipa iha festival kultura ho tema “INTERNATIONAL HEART FEST”

Atividade nee atu promove kultura Timor nian liu husi : hatais ropa tradisional (Tais), Hahan tradisional(Liu-liu Kafe Timor), dansa tradisional , no apresenta muzika “TIMOR NARAN BOT”.

Iha mos estudantes nain rua (Terezinha e Esmeraldito) nebe hanesan representa BUIBERE no MAUBERE hodi hit bandeira Timor-Leste tuir parada no Fashion show.

Iha atividade ne mos Estudante sira apresenta História Timor nian, no fatin turismo Timor nian ba ema sira nebe seidauk hatene kona ba ita nia nasaun Timor.

Estudantes nain 6 ne’e eskola iha Universidade nebe lahanesan maibe sira kolabora malu ho diak hodi tuir atividades ne to’o remata ho sucesso.

Atividade Ne’e iha nasaun lubuk ida maka tuir, hanesan Thailand , India, Pakistan , China, Korea, Japan, Malaysia , inklui Timor-Leste no seluk tan.

Esmeraldito Ferreira, Estudante ne’ebe hola parte iha festival ne’e deklara, sente orgulho no onrado bele reprezenta Timor-Leste partisipa iha eventu refere.

“Ami sente kontente no orgulho tamba ami bele representa ita nia nasaun doben Timor-Leste hodi tuir atividade cultural festival ne’e. Iha atividade ne’e ami promove cultura Timor nian hanesan ropa tradisional , hahan tradisional, dansa tradisional, fatin turismo no ami mos apresenta muzika Timor nian ho título “TIMOR NARAN BOT”.

Ho espírito voluntarismo nebe mak ami iha, no mos hanesan “Little Ambassador/Embaixador ki’ik” iha ami ida-idak nia sidade no universidade ami sempre prontu promove no hamorin rai doben Timor nia naran iha qualquer atividades nebe maka ami tuir ba, tamba iha ema barak nebe  seidauk hatene ita nia nasaun Tamba hanesan Nasaun Foun no kiik ida. Liu husi atividades sira ne ami haksolok atu fo konese ami nian Rai Timor ba kolega sira iha nee.

Ami fiar katak colega sira seluk nebe maka eskola iha rai liur mos sei sai hanesan Little ambassador iha sira nia universidade rasik.” (*/Smnews)