Polisia Asegura Ona Sidadaun Nain 21 Ba Kazu Agresaun Fiziku Hasoru Vitima SF

Smnewstl.com – Polisia Nasional Timor-Leste liu husi Servisu Investigasaun Kriminal Nasional asegura ona sidadaun nain 21 inklui autor prinsipál nain rua (Fen Laen) ba Kazu halo agresaun fiziku hasoru vitima SF ne’ebe sai viral iha Media Sosial.

Tuir informasaun ne’ebe Smnews asesu komfirma, kazu ne’e akontese iha loron, 16 Abril 2024, iha Suco Camea, Posto Administrativu Kristo Rei Município Dili no rezolve ona iha Esquadra Polisia Becora.

Sidadaun hirak ne’ebe Polisia asegura ba Smnews iha Edifisio PNTL Komando Geral Kaikoli Dili konfesa katak, la involve direita iha asaun agresaun fiziku hasoru vitima SF.

Sira simu informasaun atu akompanha inan feton ida ne’ebe koalia maka’as iha Media kona ba ‘kait’ nia laen ne’e atu ba husu tuir deit vitima SF ne’ebe sadik nia liu husi telefone.

“Maun diskumfia Selingkuh ho SF ne’e, nia fen ami bolu fali bin, maibe momentu neba, ami ba mos balun hamrik deit iha liur no balun maka tama um laran no hakilar harame deit. Baku ne’e, maun ne’e nia fen mak baku tamba diskumfia kait fali nia laen,”haktuir sira balun hodi lakoi mensiona identidade.

Sira hatutan, hafoin problema kalan ne’e lori kedas ba Esquadra Polisia Becora no rezolve ona liu husi fo sala malu hodi halo kedas deklarasaun atu problema ne’e la sai ba publiku.

Maibe derepenti sai viral fali iha media ne’e ami mos hakfodak. Ohin polisia ba mos ami la halai ida, ami mak lori hotu mai iha ne’e,”tenik sira hodi lakoi mensiona naran.

Kazu refere, vitima SF mak hato’o keixa ba Servisu Investigasaun Kriminál dader ne’e iha Kuartel Jeral PNTL Kaikoli Dili tamba la simu ho aktu ne’ebe fo sai iha media maske halo ona deklarasaun.

PNSIK ne’ebe simu keixa komunika kedas ho Esquadra Polisia Becora hodi asegura sidadaun sira ne’ebe diskumfia inklui autor prinsipal (fen ho laen) involve hodi submete ba iha prosesu investigasaun.

Kazu ne’e rasik sei iha hela prosesu investigasaun nia laran nune’e parte Polisia inklui vitima rasik seidauk halo deklarasaun ba publiku. (SMnews)