Polisia Buka Tuir Sidadaun Utiliza Naran Grupo ho Organizasaun Sadik Malu Iha MS

 CJ-Smnewstl.com – Fenomena sadik malu “Sparing” buras maka’as los iha media sosial.   Situasaun ne’ebe sai preokupasaun publiku mak involve minoridade no hetok a’at liu tan mensiona naran husi grupo hanesan arte ritual no organizasaun arte marsiais.

Aktu hirak ne’e, nia rezultado justifika iha akontesementu iha Farmasia Foho Osan Mean Oin hodi hamosu sentimentu deskontentamentu husi sosiedade tamba konsidera laos ona tempu atu Timoroan nafatin moris iha violentu laran hodi la promove Timor-Leste hanesan nasaun ida ne’ebe iha paz no hakmatek.

Ba kestaun, Komandante Operasional PNTL Municipiu Dili, Jose Luis Amaral afirma, simu ona orientasaun husi Komando nune’e buka tuir sidadaun hirak ne’e hodi halo identifikasaun tamba konsidera halo provokasaun hodi rezulta ba krime.

“Operasaun lao hela no kaer ona balun hodi lori sira nia inan aman mai halo deklarasaun hanesan kazu ne’ebe akontese iha Farmasia Foho Osan Mean Oin nomos Aituri Laran nian,”tenik Jose via Telefónica ho Smnews

Nia hatutan, razaun bolu inan aman tamba hirak ne’ebe komete aktu maioria minoridade.

“Ita bolu sira nia inan aman hodi halo deklarasaun tamba maioria mesak minoridade. Kestaun ne’e sira sadik malu lori organizasaun arte marsiais ho arte ritual nia naran, ida ne’e bele provoka hamosu krime, entaun ita tenki asegura,”tenik Jose.

Komandante Operasional Dili ne’e rekuinese, aktu balun hare hanesan halimar, maibe interpretasaun iha sosiedade la hanesan li-liu  ida ne’ebe liga ba grupo hanesan mensiona arte ritual ho organizasaun arte marsiais. (SMnews)