Smnewstl.com | CEBU, 07 Maiu 2026 – Primeiru-Ministru Timor-Leste, Kay Rala Xanana Gusmão, to’o ona iha Cebu, Filipina, hodi partisipa iha Simeira ASEAN ba dala-48 ne’ebé realiza durante loron tolu, hahu hosi 06 to’o 08 Maiu 2026.
To’o iha tuku 11:55 oras lokál, PM Xanana simu diretamente hosi Embaixadór Timor-Leste iha Filipina, Marciano Gracia da Silva, hamutuk ho Primeiru Sekretáriu Ministériu Negósiu Estranjeiru no Kooperasaun (MNEK), Pedro Laranjeira, no mós autoridade Governu lokál sira.
Atmosfera resepsaun ne’e sai espesial tebes tanba serimónia bem-vindu ho guarda ondra, akompaña ho exibisaun dansa kulturál tradisionál Cebu no múzika Timor oan “Kole Lele Mai”, ne’ebé halo delegasaun Timor-Leste sente hanesan uma rasik iha rai-liur.
Partisipasaun ida-ne’e marka istória foun ba Timor-Leste tanba ne’e mak dala dahuluk nasaun ida-ne’e partisipa iha simeira ASEAN nu’udár membru plenu ba dala-11, hafoin ofisialmente adere ba organizasaun rejionál ne’e iha Outubru 2025.
Simeira ASEAN ba dala-48 ne’e reúne Xefe Estadu no Xefe Governu hosi nasaun membru ASEAN sira hodi diskute kooperasaun rejionál, ekonomia, seguransa no dezenvolvimentu sustentável iha Sudeste Aziátiku. (/SMnews)
Komentariu