Smnewstl.com | Ermera, 28 Abril 2026 Komunidade iha Suku Leimea-Kraic, Posto Administrativu Hatolia “A”, manifesta preokupasaun boot ba kondisaun infraestrutura no risku natural sira ne’ebé kontinua afeta sira nia moris lor-loron.
Ba Smnews via telefone WatshApp, Xefe Suco Leimea Kraik, Patriciano de Araujo haktuir preokupasaun katak, dahuluk komunidade husu ba Governu atu tau matan seriu ba nesesidade urgente atu harii ponte ida iha suku refere.
Tuir sira nia hatutan, desde tempu uluk to’o agora, área ne’e seidauk iha ponte ida ne’ebé adekuadu, ne’ebé halo movimentu komunidade sai difísil liu-liu iha tempu udan.
Situasaun ne’e impede transporte produtu agríkola ba merkadu no limita asesu ba natar sira, tanba maioria iha mota sorin.
Patriciano hatutan, iha parte daruak, komunidade mos husu atu Governu aselera prosesu konstrusaun bronjong ka moru proteksaun rai hodi prevene estragus tan.
Tuir atual, nia esplika, natar sira kuaze hektares barak hetan ona estragus husi mota Grai no mota Aidaba-Lara ne’ebé frequentemente sai boot iha tempu udan.
Aleinde ne’e, impaktu husi mota sira ne’e mos ameasa linha eletrisidade no estrada publiku ne’ebé liga suku ba posto administrativu.
Komunidade husu atu autoridade kompetente bele responde lalais ba situasaun ne’e, tanba se la hetan solusaun imediata, bele kontinua fo impaktu negativu ba seguransa, ekonomia no bem-estar povu iha área refere.
Lider lokal ne’e subliña, Suku ne’ebe nia lidera ho total populasaun 1806, husi total uma kain 400, ne’ebe maioria dependensia moris ba vida agrikultor. (/SMnews)
Komentariu