Smnewstl.com | Dili, 27 Abril 2026 – Bancada Partidu Congresu Nasionál Rekonstrusaun Timor-Leste (CNRT) fo sai ba públiku dader ne’e iha uma fukun Parlamentu Nasional deklarasaun polítika ida hodi responde ba polémika ne’ebé daudaun ne’e iha palku polítika nasionál, liuliu alegasaun no akuzasaun husi deputadu sira husi Fretilin hasoru Presidente-Repúblika no lideransa CNRT.
Iha deklarasaun refere, Bancada CNRT liu husi Presidente Bancada Patrocino Fernandes dos Reis kondena maka’as liafuan husi deputada Maria Angélica Rangel no nia kolega sira ne’ebé afirma katak José Ramos-Horta “iha CNRT nia kalilin okos”.
Tuir CNRT, alegasaun ne’e la’ós bazeia ba argumentu legál ka konstitusionál, maibé hanesan atake pesoál ne’ebé bele hamosu tensaun polítika no sosial iha sosiedade.
Bancada ne’e mós rejista akuzasaun husi deputada Nurima Alkatiri ne’ebé dehan katak deputadu CNRT “faan oan-feto” atu hetan kargu iha Parlamentu Nasionál.
CNRT konsidera liafuan ne’e nu’udar akuzasaun falsu no grave, ne’ebé la deit hatu’un dignidade ema sira nian, maibé mós bele klasifika nu’udar krime defamasaun no kalúnia tuir lei penal Timor-Leste.
Iha nia pozisaun, CNRT reafirma katak, tuir Konstituisaun Repúblika Demokrátika Timor-Leste, Presidente-Repúblika mak ógaun soberanu ida ne’ebé independente no sai nu’udar simbulu unidade nasionál.
Nune’e, maske kandidatu ida hetan apoiu polítiku husi partidu ruma, bainhira eleitu ona, nia tenke hala’o knaar tuir konsiénsia no interese nasaun nian, la’ós subordinadu ba partidu polítiku ida.
Hodi sustenta argumentu ida ne’e, CNRT fó ezemplu husi Prezidenti sira uluk hanesan Taur Matan Ruak no Francisco Guterres Lú Olo, ne’ebé maske hetan apoiu polítiku, hatudu independénsia iha sira nia desizaun, inklui iha tempu mosu diverjénsia ho partidu ne’ebé fó apoiu.
Relasiona ho lideransa CNRT, Bancada ne’e defende katak Kay Rala Xanana Gusmão hanesan figura istoriku no líder rezisténsia, sempre hatudu respeitu ba independénsia polítika ema ida-idak no kontribui maka’as ba unidade no dezenvolvimentu nasaun.
Sira konsidera katak akuzasaun hasoru nia la’ós deit afeta reputasaun pesoál, maibé mós insultu ba istória luta libertasaun no dignidade povu Timor-Leste.
Atu remata, Bancada CNRT apela ba públiku atu halo avaliason kritiku ba informasaun ne’ebé sirkula iha espasu públiku no la fo fiar ba deklarasaun ne’ebé la bazeia ba faktu.
Sira mós reafirma kompromisu atu kontinua servisu ba interese povu no dezenvolvimentu nasaun. (/SMnews)
Komentariu