Smnewstl.com | Dili, 19 Abril 2026 – Sidadaun xineza nain rua ne’ebé diskumfia ho indísiu forte katak utiliza osan falsu ho valor $100 hodi halo kompra iha Centro Supermercado Kampung Alor, Díli, loron hirak liu ba halai ona husi Timor-Leste, Domingo, (19/04/2026) ne’e ho aviaun komersial antes autoridade sira kaptura.
Tuir informasaun ne’ebé hetan, kazu ne’e akontese iha loron hirak liu ba hafoin makina iha Supermercado Centro identifika osan nota dolar $100 falsu, no parte loja imediatamente hato’o informasaun ba autoridade kompetente hodi buka tuir.
Komandu Polícia Nacional Timor-Leste liu husi Diresaun Servisu Investigasaun Kriminal (DSIK), lideradu husi Superintendente Xefe João Belo dos Reis ho ninia ekipa, ne’ebe simu informasaun desloka kedas ba Aeroporto Internacional Nicolau Lobato hodi tenta kaptura suspeitu sira.
Maibé, bainhira ekipa to’o iha aeroportu iha oras tuku 12:30 OTL, sidadaun rua refere iha ona aviaun laran ne’ebé hahú ona prosesu semo.
Autoridade imigrasaun ne’ebé simu ona informasaun tenta atu trava sira, maibé la konsege tamba suspeitu sira ultrapasa tiha ona prosesu check-in no aviaun hahú ona semo, nune’e labele hatun fali.
Evidénsia liu husi vídeo CCTV ne’ebé autoridade seguransa aprezenta hatudu katak sidadaun rua refere utiliza osan falsu durante tranzasaun iha supermercado refere.
Ligadu ho kazu ne’e, Diresaun Servisu Nasionál Kriminal kontinua halo investigasaun no konsege deskobre tan osan falsu ho kuantidade to’o 4 miliaun iha armagen Y&W, ne’ebe lokaliza iha Bidau.
Kazu ne’e hetan atensaun maka’as husi Prezidente Republika, José Ramos-Horta no Primeiru-Ministru, Kay Rala Xanana Gusmão nune’e submete ona ba prosesu justisa, no tribunal deside aplika medida koasaun prizaun preventiva ba arguidu nain tolu ne’ebé liga ho rede produsasaun osan falsu. (/SMnews)
Komentariu