Smnewstl.com 15-10-2021 (Dili) – Polísia Nasionál Timor-Leste (PNTL) liu husi komandu polísia munisípiu Baucau, ka’er ona suspeitu QUS ho nia kolega ne’ebé oho veteranu Celestino Boavida ho kodiku Lemorai iha Iradu’u Samaguia, Suco Tequinomata, Posto Administrativo Laga, Munisípiu Baucau hodi halo identifikasaun.
Komandante Jerál PNTL, Komissáriu Faustino da Costa konfirma, komandu simu ona informasaun mosu duni akontesimentu ta’a veteranu Lemorai.
Motivu husi kazu refere, vítima ho inisiál CP ho kódiku Lemorai ho suspeitu sira sei iha relasaun família, no diskonfia sira iha problema hadau malu rai.
“Kazu ne’e akontese duni iha dia 14 kalan vítima ne’e agora dadauk polísia foti inklui autór prinsipál, maibé ne’e mai husi problema família, ne’ebé kontinua problema família hahú kedas iha fulan balun liu bá, ida-ne’e mak akontese tan iha dia 14 kalan,” informa Komissáriu Faustino da Costa, hafoin partisipa iha serimónia lansamentu manual formasaun diretus umanus bá membru PNTL iha PDHJ, sesta ohin.
Hafoin ta’a vítima Lemorai nia kakorok kotu, autór sira konsege halai lakon, maibé polísia konsege kaptura kedas suspeitu sira, no agora dadaun suspeitu sira iha hela sela detensaun Komandu Polísia Munisípiu Baucau hodi submete bá investigasaun.
“Autór oras ne’e ita detein hela sela kontinua prosesu, agora dadauk, iha na’in-rua mak ita foti lori bá iha komandu PNTL Baucau, mais dala ita tan ha’u hakarak hatete katak, inísiu husi problema uma laran, autór, vítima ho suspeitu ne’e mesak família rasik de’it,” relata Komissáriu Faustino.
Entretantu, kazu omisídiu ne’e akontese iha kinta-feira (14-10-21) iha tuku 9 kalan, iha Iradu’u Samaguia, Suco Tequinomata, Posto Administrativo Laga, Municipio Baucau.
Vítima inisiál CP ne’ebé hó kódiku Lemorai moris iha Laga munisípiu Baucau iha loron 24 fulan Augusto 1974. Enkuantu suspeiru ho inisiál QUS ho idade tinan 25.(ant)
Komentariu