Smnewstl.com 04-10-2021 (Dili) – Governu Xina liu husi embaixada Xina iha Timor-Leste, semana kotuk fó apoiu motorizada hamutuk 20 bá unidade Polísia Militár FALINTIL Forsa Defeza Timor-Leste (F-FDTL) hodi hala’o servisu.
Xefe Estadu Maiór Jenerál Forsas Armadas, Brigadeiru Jenerál Calisto Santos ‘Coli Coliati’ informa, motorizada hamutuk unidade 20 ne’e, governu Xina fó apoiu gratuita de’it.
“Motorizada sira-ne’e ita hetan apoiu husi ita-nia parseirus ita-nia amigus sira, motorizadas foun sira-ne’ebé ita-boot sira haree, ne’e apoiu husi Xina mai Timor-Leste, ne’e apoiu gratuita 20,” dehan Brigadeiru Jenerál Coliati, hafoin ensera kursu protesaun seguransa autoridade iha unidade Polísia Militár Quintal Boot, Dili. Segunda ohin.
Motorizada unidade 20 ne’e, espesífiku de’it bá unidade Polísia Militár mak utiliza, liu-liu hodi fó ekipa batedores hodi fó seguransa bá autoridade inklui halo konvoi sira-ne’ebé governu presiza.
“Ne’e espesífiku bá Polísia Militár de’it, ne’e utiliza bá hala’o servisu sira hanesan dadauk ita-boot sira haree, bá batedores akompaña autoridades sira, konvoi militár sira no mós konvoi sira-ne’ebé governu presiza husi parte polítika, husi parte polítika presiza dalaruma iha vizita mai husi li’ur, depois Polísia Militár sei apoiu nafatin PNTL atu bele garante seguransa bá autoridade sira,” tenik nia.
Entretantu, motorizada refere dadauk ne’e, para hela iha kuartel unidade Polísia Militár Quintal Boot, Dili. Hafoin simu doasaun gratuita husi governu xina iha semana hirak liu bá.(ant)
Komentariu