SMnewstl.com | Ermera, 20 Abril 2026 – Prezidente Autoridade Munisípiu Ermera, José Martinho dos Santos, fó orientasaun ba ekipamentu pezadu sira atu halo normalizasaun urjente estrada Gleno-Letefoho, maske projetu reabilitasaun ofisiál sei hein nafatin desizaun husi Governu Sentral.

Medida urjente ne’e foti hodi responde ba preokupasaun boot husi sidadaun no motorista sira kona-ba kondisaun estrada ne’ebé aat tebes, hodi difikulta movimentu transporte entre kapital munisípiu Gleno no Postu Administrativu Letefoho.

ADVERTISEMENT
SCROLL FILA BA NOTISIA


José Martinho esplika katak desizaun atu halo normalizasaun provizóriu ne’e mos tanba hein tempu naruk ba prosesu reabilitasaun ofisiál husi Ministériu Obras Públikas.

Lee Mós:
Grupu Mediador Husi Sudeste Aziatiku Sei Tulun Mediasaun Konflitu Iha Timor

Tanba ne’e, Autoridade Munisípiu deside mobiliza kedas ekipamentu pezadu sira atu hadia fatin sira ne’ebé grave liu.

“Normalizasaun agora dadaun lao hela. Hau rasik to’o iha Letefoho no haree direita kondisaun estrada, nune’e hau kontaktu kedas Ministériu Obras Públikas no orienta atu halo normalizasaun ba bé no rai tahu

,” hateten José Martinho liu hosi telefóne.

Servisu ne’e hahú ona desde sábadu semana kotuk, ho ekipamentu pezadu sira foka liu ba área sira ne’ebé estraga boot, hanesan iha Eraulo no Goulolo, hodi garante transporte públiku hanesan bis, angguna no trek bele liu fila-fali.

Lee Mós:
Ministeriu Defeza No Instituisaun Tuteladaa Aprezenta Ona Tetu OJE 2026 Ba KRO

Maski nune’e, nia hateten katak mobilizasaun ekipamentu pezadu ne’e inicialmente atu halo reabilitasaun kompletu, maibé tanba prosesu sei hein aprovasaun final husi Governu Sentral no konsultan, mak agora foti medida normalizasaun urjente nudar solusaun temporáriu.

Prezidente Autoridade Munisípiu mos husu ba komunidade atu kontinua pasiénsia no fó tempu ba Governu atu realiza projetu ne’e ho kualidade.

“Ba populasaun sira, imi tenki pasiénsia no fuan boot, tanba estrada ida ne’e importante tebes no tenki halo ho di’ak atu dura kleur,” nia afirma.

Lee Mós:
Xanana Simu Afiliantes Militante PLP, FRETILIN, KHUNTU No PD Hosi Delta Tres No Lahane Orientál

Rekorda katak projetu reabilitasaun estrada Gleno–Letefoho, ne’ebé lansadu diretamente husi Primeiru-Ministru Kayrala Xanana Gusmão iha 26 Janeiru 2026, to’o agora seidauk hahú implementasaun iha terenu.

Projetu ida ne’e kobre distánsia husi Letefoho (km 30+230) to’o Gleno (km 54+370), ho kontratu TENDER/191/MOP-2024, durasaun servisu tinan ida (loron 365) no orsamentu total to’o USD 38.8 millaun, ne’ebé sei implementa husi China Civil Engineering Construction Corporation. (/SMnews)

Lee nain: 43