Governu Hein Desizaun Husi Tribunal: Molok Deporta Suspeitu Estranjeiru Envolve Scam Call Center no Jogu Online Ilegál

SMNewsTL.com | Dili, 12 Agostu 2026 — Governu Timor-Leste, liuhusi Ministériu Interior, sei hein desizaun Tribunal molok foti medida deportasaun ba sidadaun estranjeiru sira ne’ebé suspeitu envolve iha atividade scam call center no jogu online ilegál iha Timor-Leste.

Ministru Interior, Francisco Guterres, hatete katak prosesu judisiál ba suspeitu sira sei lao hela, no Governu sei hein Tribunal fó desizaun molok kontinua ho prosesu deportasaun tuir mekanizmu legal ne’ebé vigora.

Governu liuhusi Ministériu Interior mos halo ona koordenasaun ho Embaixada China no reprezentante diplomátiku husi nasaun sira seluk, hodi prepara mekanizmu apropriadu ba deportasaun bainhira prosesu judisiál remata.

Ministru hatete katak antes ne’e Governu mos deporta ona sidadaun na’in rua ba China, no koordenasaun ho reprezentante diplomátiku sei kontinua atu fasilita prosesu deportasaun ba suspeitu sira seluk, tuir desizaun no prosedimentu legal.

Iha parte seluk, Servisu Migrasaun sei reforsa kontrolu kona-ba utilizasaun viza. Ministru subliña katak sidadaun estranjeiru ne’ebé tama Timor-Leste ho viza turista no remata ona prazu loron 30 tenke fila ba sira-nia nasaun. Ema ne’ebé hakarak servisu iha Timor-Leste tenke uza mekanizmu viza servisu antes tama iha territóriu nasional.

“Ema ne’ebé mai Timor-Leste ho viza turista no remata ona prazu loron 30, tenke fila ba sira-nia nasaun. Enkuantu ema ne’ebé hakarak mai servisu, tenke uza mekanizmu viza servisu antes tama Timor-Leste,” dehan Ministru Interior.

Alende ne’e Governu mos hapara temporariamente prosesu regularizasaun ba ajénsia legal na’in sia, hodi halo verifikasaun no asegura katak ajénsia sira kumpre duni ho kritériu no regra ne’ebé eziste.

Ministru Francisco Guterres hatete katak investigasaun kona-ba kazu scam call center no atividade ilegál sira ne’e sei kontinua, inklui haree posibilidade ligasaun ho área migrasaun.

Governante subliña katak ekipa Ministériu Interior sei remata uluk investigasaun antes Governu fó informasaun liután kona-ba rezultadu no medida sira ne’ebé sei foti.(Smnews)